Elordada «Altyn Gefest» salalyq baıqaýynyń jeńimpazdaryn marapattaý rásimi ótti. Dástúrli konkýrs «Astana Mining & Metallurgy» (AMM) Halyqaralyq taý-ken metallýrgııa kongresi aıasynda ótkizilip otyr, dep jazady Egemen.kz.
Baıqaýǵa geologııa, taý-ken, metallýrgııa salasynyń mamandary, jobalaý, ǵylymı jáne oqý mekemeleri men kásiporyn qyzmetkerleri sondaı-aq jýrnalıster qatysty.
Bıylǵy konkýrs 14 nomınasııa boıynsha uıymdastyryldy. Arnaıy qurylǵan qazylar alqasynyń sheshimi boıynsha «Jyldyń úzdik geology» atalymyna «Dva Keı» JShS bas dırektory Nıkolaı Kamenskıı ıe boldy. Al «Jyldyń úzdik metallýrgy» nomınasııasyna Aqtóbe ferroqorytpa zaýytynyń 6 razrıadtaǵy ferroqorytýshysy Galıpýlla Bısenov laıyq dep tanyldy. «Jyldyń úzdik kenshisi» atalymyn «Nurqazǵan» kenishiniń dırektory Muqan Ýngıtbaev qanjyǵasyna baılasa, «Saran» shahtasynyń dırektory Vladımır Shnel jyldyń úzdik shahteri atandy.
Sondaı-aq konkýrs qorytyndysy boıynsha «Taý-ken salasyndaǵy áıel» nomınasııasymen «Vostoksvetmet» JShS bas ınjener-baıytýshysy Evgenııa Kokoreva marapattaldy. Al óndiristik qaýipsizdik boıynsha «Taý-Ken Altyn» JShS úzdik dep tanyldy.
Qaraǵandy tehnıkalyq ýnıversıtetiniń professory Iýrıı Pak jyldyń úzdik ǵalym-pedagogi atansa, A. Saǵynov atyndaǵy QTÝ stýdenti Anastasııa Stekolnıkova «Jyldyń úzdik dıplomdyq jumysy» atalymyna ıe boldy.
Sonymen qatar «Jyldyń úzdik medıa jobasy – «Taý-ken salasy boıynsha úzdik televızııalyq jumys» nomınasııasymen «Atameken Business» telearnasynyń tilshisi Jalǵas Azǵanbaev, «Taý-ken salasy boıynsha úzdik jýrnalıstik jumys» atalymymen «Atameken Business» telearnasynyń tilshisi Oleg Gýsev marapattaldy. Al «Kazahstanskaıa pravda» respýblıkalyq gazetiniń tilshisi Marına Demchenkonyń materıaly úzdik jýrnalıstik maqala retinde tanyldy.