Qostanaı veterınarııa basqarmasy Fedorovskıı jáne Qarabalyq aýdandarynda qustardyń neden qyrylǵanyn túsindirdi, dep habarlaıdy Egemen.kz.
Vedomstvo atap ótkendeı, 9 sáýirde veterınarlyq qyzmetke Qarabalyq aýdanynyń Toǵyzaq, Verenka, Smırnovka jáne Mıhaılovka eldi mekenderinde qustarda Nıýkasl aýrýyna uqsas klınıkalyq belgiler baıqalǵany týraly habarlamalar túse bastaǵan.
«Aýdannyń veterınarlyq qyzmeti aýrý qustyń bıologııalyq jáne patologııalyq materıaldaryn jınap, Nıýkasl aýrýyna tekserý úshin Nur-Sultan qalasynyń veterınarııa jónindegi ulttyq referenttik ortalyǵyna jiberdi. Qus aýrýy tirkelgen jeke qosalqy sharýashylyqtarda Qarabalyq aýdanynyń veterınarlyq stansııasy aýrýdyń taralýyna tosqaýyl qoıý maqsatynda qora-qopsy men aýlalardy dezınfeksııalap, 1444 bas qusqa profılaktıkalyq ekpe saldy. Qustardy qaıta vaksınalaý alǵashqy ekpeden keıin eki aptadan soń qarastyrylǵan», dep túsindirdi veterınarııa basqarmasynan.
Vedomstvo habarlaǵandaı, 9 maýsymnan beri óńirde qus aýrýy tirkelgen joq. Fedorov aýdanyna kelsek, veterınarlyq qyzmettiń málimeti boıynsha qustardyń jappaı qyrylýy tirkelmegen. Qustardyń ólý faktilerin turǵyndar aýdandyq veterınarııa qyzmetine habarlaǵan joq.
Aldyn ala aqparatqa sáıkes, 15 maýsymda Lenıno aýylynda 3 qus ólgen.