Aqtaý qalasynda kóbelekter men qyzyl qońyzdar kúrt kóbeıdi, dep habarlaıdy Egemen.kz.
Mamandar jándikterdiń kúrt kóbeıgenin Mańǵystaý oblysynda kóktemniń jańbyrly bolǵanymen baılanystyrady. Bıologtardyń aıtýynsha, buǵan alańdamaýǵa bolady. Sebebi qalada ushyp júrgen jándikter – kádimgi qyzyl qońyzdar men kóbelekter. Olar adamǵa esh qaýip tóndirmeıdi.
«Aqtaýda bıyl kóktem jaýyn-shashyndy, ylǵaldy boldy, sonyń arqasynda bórtegúl, jońyshqa sııaqty ósimdikter jaqsy ósti. Al kóbelekterdiń bul túri osy ósimdikterdiń shyrynymen qorektenedi. Bizdiń óńirde qonys aýdaratyn alǵashqy kóbelekterdi mamyr aıynyń aıaǵynda nemese maýsymnyń ortasynda kórýge bolady. Buryn mundaı jaǵdaılar Mańǵystaý oblysynda 2019 jyldyń maýsymynda, 2018 jyldyń mamyrynda jáne 2015 jyldyń maýsymynda baıqalǵan», dedi Sh.Esenov atyndaǵy Kaspıı memlekettik tehnologııalar jáne ınjınırıng ýnıversıteti jaratylystaný ǵylymdary kafedrasynyń meńgerýshisi, bıologııa professory Látıpa Qojamjarova.
Mamandardyń baqylaýynsha, 2019 jyly mamyr aıynyń ekinshi jartysynda Ázerbaıjan men Túrikmenstan aýmaǵynda kezdesken qonys aýdaratyn kóbelekter Qazaqstanǵa úsh apta aıyrmashylyqpen ushyp kelgen. Boljam boıynsha olardyń endigi baǵyty – О́zbekstan. Endi aldaǵy aptanyń sońyna qaraı Mańǵystaý oblysynda kóbelek pen qyzyl qońyzdar sany azaıady dep kútiledi.