Qostanaı oblysyna qarasty Torǵaı aýylynda Ahmet Baıtursynuly men Mirjaqyp Dýlatulyna eskertkish ornatý máselesi talqylandy. Bul týraly Qostanaı oblysynyń ákimi Arhımed Muhambetov aıtty, dep habarlaıdy Egemen.kz.
«Alash arysy Ahmet Baıtursynulynyń mereıtoıyna arnalǵan josparǵa sáıkes Jangeldın aýdany turǵyndarynyń turmysyn jáne ál-aýqatyn jaqsartý maqsatynda ınfraqurylymdyq jobalar iske asyrylýda. Máselen, jýyrda ǵana Aqkól, A.Baıtursynov aýyldary mobıldik ınternet jelisine qosyldy. Bul – mereıtoıǵa ázirlik barysynda jergilikti halyqtyń suraǵan negizgi ótinishteriniń biri bolatyn. Jergilikti turǵyndardyń suraýy boıynsha A.Baıtursynuly aýylyna aparatyn joldyń jáne Torǵaı ózeni arqyly ótetin kópirdiń jóndeý jumystary bastalyp ketti. Sonymen qatar A.Baıtursynuly aýylyna jańadan medısınalyq pýnkt salynyp, Aqkóldegi aýyldyq ambýlatorııa jóndeýden ótkiziledi. Jospar aıasynda Torǵaı aýylyndaǵy «Ahmet Baıtursynuly men Mirjaqyp Dýlatulynyń ádebı mýzeıine» jóndeý jáne reekspozısııa jumystary júrgizilýde», dedi óńir ákimi Ortalyq kommýnıkasııalar qyzmetinde.
Onyń aıtýynsha, Sarytúbek qonysyndaǵy «Ahmet Baıtursynuly mýzeı-úıin» salý jumystary qatań baqylaýǵa alyndy. Búgingi tańda jańa nysannyń jobalyq smetalyq qujattamasy saraptamadan ótkizilýde. Qurylys jumystaryna oblys bıýdjeti esebinen qosymsha qarajat bólinedi. Konkýrstyq rásim nátıjesi boıynsha jaýapty merdiger tabylsa, úıdiń qurylysyn qyrkúıekke deıin aıaqtaý josparlanǵan.
«Jergilikti halyq pen kásipkerlerdiń demeýshiligimen Baıtursyn áýletiniń qorymy janynan kesene salynyp, Torǵaı aýylynda Ahmet pen Mirjaqyp babalarymyzdyń qurmetine jańa eskertkish ornatý máselesi pysyqtalýda. Budan bólek mádenı, ǵylymı, tanymdyq is-sharalar uıymdastyrylyp jatyr. Spektaklder qoıylyp, ǵylymı ekspedısııa da óz jumysyn bastady. Negizgi mereıtoılyq is-sharalar 3-5 qyrkúıek aralyǵyna josparlanǵan», dedi Arhımed Muhambetov.