Baıqadyńyzdar ma, bizdiń Úkimettiń jumys isteý stıli ózgergen sekildi. Kóp jaǵdaıda astanadaǵy at shaptyrym kabınetinen alty qadam attap shyǵýǵa qulyqsyzdyq tanytatyn mınıstrler qazir óńirlerdi aralap júr. Bul – úlken ózgeris. О́ıtkeni qarjy men bılik ortalyqta bolǵanymen, problemanyń bári óńirlerde ǵoı.
Atalǵan ózgeristiń Memleket basshysy Qasym-Jomart Toqaev aıtqan Jańa Qazaqstan – Ádiletti Qazaqstan tujyrymdamasynan keıin bastaý alǵany aıtpasa da túsinikti.
Esterińizde bolsa, Prezıdent bıylǵy sáýirde ortalyq atqarýshy organdar basshylarynyń halyqpen kezdesýlerin ótkizý týraly qaýlyny bekitti. Qaýlyǵa sáıkes, Qorǵanys, Syrtqy ister mınıstrlikterinen basqa vedomstvolardyń basshylary jyl boıy halyqpen turaqty kezdesýler ótkizýi kerek.
Sondaı-aq olar qandaı da bir óńirde jetekshilik etetin sala boıynsha jaǵdaıdyń nasharlaý táýekelderi boljanǵan ne týyndaǵan jaǵdaıda, halyqpen kesteden tys kezdesý ótkizýge mindetti.
Sonymen qatar onlaın-translıasııalar, qajet bolǵan jaǵdaıda beınekonferensbaılanys uıymdastyrý arqyly kezdesýler ótkizý jaǵyn da qarastyrýy kerek. Qaýlyda kórsetilgendeı, kezdesý úshin josparlanǵan ýaqyttyń tórtten birinen aspaıtyn bóligin baıandamaǵa, qalǵan bóligin «suraq-jaýap» formatyna arnaýy kerek.
Prezıdenttiń osy bir bastamasy óz jemisin berip jatyr dep aıtýǵa tolyq negiz bar. Máselen, osy aıdyń basynda Indýstrııa jáne ınfraqurylymdyq damý mınıstri Qaıyrbek О́skenbaevtyń Batys Qazaqstan jáne Atyraý oblystaryna baryp, bas-basyna bı bolǵan jol salýshy merdigerlerdi «ornyna qoıǵanyn» kórdik. Oral men Atyraý arasyn kólikpen júrip ótip, jóndeý jumystarymen jiti tanysyp qaıtqanyn estigende ishimizdiń jylyp qalǵany jáne ras.
Sol sekildi osy aıdyń orta tusynda Aqparat jáne qoǵamdyq damý mınıstri Asqar Omarovtyń Aqtóbege barǵan saparyn Facebook arqyly qadaǵalap otyrdyq. Ádette qoǵamda mınıstrler oblys ortalyǵynan árige barmaıdy degen túsinik qalyptasqan ǵoı. Aqparat mınıstri Yrǵyz aýdanyna baryp, odan alystaǵy Alǵa degen aýyldyń halqymen júzdesip, «tot basqan» túsinikti totynan aryltqandaı boldy. Mınıstr Asqar Omarovpen kezdesken Alǵa jastarynyń endigi ómiri de burynǵydaı bolmasy anyq.
Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsınniń sońǵy bir aıda Aqtóbe jáne Pavlodar oblystaryna barǵanyn, halyqpen birneshe kezdesý ótkizgenin kórip qýandyq.
Shynynda da, mınıstrlerdiń aýdan-aýyldy aralaýy bılik pen buqara arasyndaǵy alshaqtap ketken baılanysty jaqyndastyryp, nyǵaıta túseri aqıqat. Eń bastysy, halyqtyń bılikke degen senimin arttyrary daýsyz. Senimnen úlken eshteńe joq ekenin eskersek, Úkimet jumysyndaǵy oń ózgerister jaqsylyqtyń aýylyna bastaıdy degen úmittemiz.
Mınıstrler óńirlerdi jıi aralap, aýdan-aýyldy tegis qamtý arqyly jergilikti jerdegi ózekti problemalarmen jete tanysady. Jaǵdaıǵa syrttaı qanyqqanan góri, kózben kórip, júrekpen sezingen, jergilikti halyqtyń únine qulaq túrgen áldeqaıda jaqsy ǵoı. Sonda máseleniń sheshý joldaryn tabý da ońaıǵa túsedi.
Biz «burynǵy mınıstrler óńirlerge barmaıtyn edi» deýden aýlaqpyz. Olar da shama-sharqynsha aýdan-aýyldy aralaǵany daýsyz. Biraq olardyń joly qazirgideı jıi túse bermegeni belgili. Bálkim, ondaı qajettilik te bolmaǵan shyǵar.
Osy oraıda taǵy bir jaıdy aıtyp ótpeske bolmaıdy. Mınıstr sekildi mártebeli meımandardyń barys-kelisi óńirdegi sheneýnikterdi ábigerge túsiretini jáne bar. Mınıstr – qatardaǵy kóp qonaqtyń biri emes. Sondyqtan jergilikti basshylyq olardy jaqsylap kútip alýǵa, ıilip jastyq, jaıylyp tósek bolýǵa tyrysady. Onyń astarynda «О́ńirge oń kózben qaraı júrsin» degen tilek jatqany aıtpasa da túsinikti ǵoı. О́kinishtisi, qonaq kútýge bıýdjette qarjy qarastyrylmaǵandyqtan, sheneýnikter kóp jaǵdaıda kásipkerlerdiń kómegine júginedi. Sybaılas jemqorlyqtyń bir sebebi de osynda jatqandaı. Ol endi bólek áńgime...