Ekibastuz qalasynda jedel-izdestirý is-sharalaryn júrgizý barysynda alaıaqtyq jasaǵan úsh kúdikti ustaldy. Olardyń biri buryn adam tonaǵany úshin sottalǵan pavlodarlyq turǵyn bolyp shyqty, dep habarlaıdy Egemen.kz.
Pavlodar oblystyq polısııa departamentiniń baspasóz qyzmeti habarlaǵandaı, kúdiktilerdiń áreket etý shemasy áshkerelengen. Iаǵnı, olar ózin polısııa qyzmetkeri retinde tanystyryp, ózgelerdi aldap kelgen.
Belgili bolǵandaı, alaıaqtar kóshedegi azamattardy qujat tekseremiz degen syltaýmen sózge tartqan. Ary qaraı aqparattyq júıeler kómegimen bankter qosymshalarynda sáıkestendirýden ótkizip (bıometrııalyq derekterdi qoldana otyryp), azamattarǵa taýarlyq jáne qolma-qol nesıe rásimdep alyp otyrǵan.
«Qazir kúdiktilerdiń Pavlodar, Ekibastuz, Aqsý qalalarynda 8 faktige qatysy bar ekeni anyqtaldy. Sondaı-aq ustalǵandardan polısııa qyzmetkeriniń jalǵan qyzmettik kýáligi tárkilendi», dedi Pavlodar oblysy PD bastyǵy Vasılıı Sklıar.