Prezıdent Premer-Mınıstrdiń orynbasary – Saýda jáne ıntegrasııa mınıstri Baqyt Sultanovty qabyldady, dep habarlaıdy Egemen.kz.
Memleket basshysyna Qazaqstannyń DSU-ǵa múshe elder mınıstrleriniń 12-konferensııasyna tóraǵalyǵynyń qorytyndysy týraly baıandaldy. Jıyn barysynda mańyzdy sheshimder qabyldanǵan. Atap aıtqanda, DSU-ny reformalaý úderisin bastaýǵa jáne 20 jyldan astam ýaqytqa sozylǵan Balyq aýlaý sýbsıdııalary týraly jańa kelisimdi qabyldaýǵa qol jetkizildi.
Qasym-Jomart Toqaevqa mınıstrliktiń syrtqy saýdany damytý jáne ekonomıkalyq ıntegrasııa aıasynda ulttyq múddeni qorǵaý jumystarynyń nátıjesi usynyldy.
Premer-Mınıstrdiń orynbasary – Saýda jáne ıntegrasııa mınıstri bıylǵy 4 aıdyń ishinde shıkizattyq emes taýarlar eksporty byltyrǵy osy kezeńmen salystyrǵanda 33,9 paıyzǵa artyp, 5,6 mıllıard dollardan 7,5 mıllıard dollarǵa deıin óskenin málimdedi. Qyzmet kórsetý eksporty 5,8 mıllıard dollarǵa jetken.
Memleket basshysyna transshekaralyq habtardy jáne saýda-logıstıkalyq ınfraqurylymdy órkendetý, sonyń ishinde «Soltústik – Ońtústik» kólik dálizi men Transkaspıı halyqaralyq kólik baǵyty boıymen damytý jónindegi jobalardyń júzege asyrylý barysy týraly málimet berildi.
Baqyt Sultanov Úkimettiń negizgi azyq-túlik taýarlary baǵasynyń turaqtylyǵy men qoljetimdiligin qamtamasyz etý sharalary jóninde esep berdi. Onyń aıtýynsha, 2022-2024 jyldarǵa arnalǵan azyq-túlik qaýipsizdigin qamtamasyz etý jónindegi jospardyń júzege asyrylýy 2024 jylǵa qaraı ımportqa táýeldi negizgi taýarlar boıynsha halyqty júz paıyz qamtamasyz etýge múmkindik beredi.
Sondaı-aq Prezıdent syrtqy saýda qyzmetin jandandyrý jáne shetel naryǵyndaǵy Qazaqstan ónimderin ilgeriletý jóninde tapsyrma berdi. Memleket basshysy ishki naryqty qamtamasyz etý úshin negizgi azyq-túlik taýarlary eksportyn retteý qajet ekenine basa mán berdi.