ORK: Jańa Konstıtýsııany qoldaǵandar – 87,15 paıyz

Ortalyq referendým komıs­sııasynyń tóraǵasy Nurlan Ábdirov 16 naýryzdaǵy tańǵy saǵat 8.00-degi jaǵdaı boıynsha elimizdiń barlyq óńiri men sheteldegi 10 388 referendým ýchaskesinde daýystardy sanaý aıaqtalǵanyn málimdedi. 

«Keshe tańerteń aýmaqtyq referendým komıssııalary daýys berý nátıjeleri týraly hattamalardyń elektrondyq kóshirmelerin usyn­dy. Oblystardyń, Astana, Almaty, Shymkent qalalarynyń komıssııa­larynan alynǵan derekterdiń negizin­de Ortalyq referendým komıssııasy respýblıkalyq referen­dým­da da­ýys berýdiń aldyn ala nátı­je­lerin anyqtady», dedi N.Ábdirov.

Referendýmǵa qatysýǵa quqy­ǵy bar 12 482 613 el azama­ty­­nyń 9 127 192-si (73,12 pa­ıyz) daýys berý ýchaskelerine kelip, qa­tysty. «2026 jylǵy 12 aq­panda buqaralyq aqparat quraldarynda jarııalanǵan Qazaqstan Respýblıkasynyń jańa Konstıtýsııasyn qabyldaısyz ba?» degen suraqqa 7 954 667 adam «Iá, qabyldaımyn», 898 099 adam «Joq, qabyldamaımyn» dep jaýap bergen. 

146 558 bıýlleten jaramsyz dep tanylǵan, 127 868 bıýlleten jaramdy, biraq esepke alynbady, óıtkeni olarda jaýap nusqalarynyń ekeýi de belgilengen.

«Respýblıkalyq referendým týraly zań­namanyń normalaryna sáıkes, eger referen­dýmǵa qatysý quqyǵy bar azamattar­dyń jartysynan kóbi daýys berýge qatysqan bolsa, referendým ótkizilgen dep sanalady. Respýblıkalyq referendýmǵa shyǵarylǵan másele boıynsha sheshim eger ony jaqtap, oblystardyń, respýblıkalyq mańyzy bar qalalardyń, astananyń keminde úshten eki­sinde daýys berýge qatysqan aza­mattardyń jartysynan asta­my jaqtap daýys  berse, «qa­byl­dandy» dep esepteledi», dedi N.Ábdirov ORK-da ótken brıfıngte.

ORK tóraǵasynyń aıtýynsha, respýblı­kalyq refe­rendým zańnamasyna sáıkes, aýmaqtyq referendým komıssııalary daýystar sanalǵannan keıin árbir óńir boıynsha hattamalardyń túpnusqalaryn Ortalyq referendým komıssııasyna tabystaýy qajet. Respýblıkalyq referendýmnyń qorytyn­dylary Ortalyq referendým komıssııasynda belgilenedi.