Respýblıkalyq «Senimen bolashaq» qoǵamdyq birlestiginiń ıgi sharalary týraly habarlar keıingi jyldary jıi estilip júr. Onyń Soltústik Qazaqstanda ótkizilip jatqan sharalary da halyqtyń qyzyǵýshylyǵyn týdyryp, únemi jurttyń aýzynda júredi. Sonyń ishinde Naýryzdy jańa formatta ótkizýge arnalǵan «Sen Bol Nauryz» is-sharasynyń mańyzy da zor.
Joba árbir qazaqstandyqqa Naýryzdyń shynaıy mánin sezinýge, jyl basyn dástúrge saı qarsy alýǵa múmkindik beredi. Halyqtyń qar basqan qatań qystan aman qutylǵanda kóterilgen kóńil kúıi bul merekede jappaı kórsetiledi. Munda jasandy sán-saltanat pen syrtqy jyltyraqtar emes, mazmun men mán aldyńǵy orynǵa qoıylǵan. Qonaqtar tek kórermen emes, merekeniń barlyq kezeńine tikeleı qatysýshy bolady. «Sen Bol Nauryz» degen tirkestiń ózi «Sen de Naýryzdyń bir bólshegi bol» degen maǵynany bildiredi.
«Qazaqta «ózińdi tap – ózegińe oral» degen tereń maǵynaly sóz bar. Iаǵnı ózińdi taýyp, túp tamyryńa qaıt degendi bildiredi. Kóp jyl boıy syrttan kelgen túrli aǵym men fılosofııa ulttyq kodymyzdy álsiretti. Qoǵamda óz dástúrimizdiń san túrli túsindirmeleri paıda boldy. «Sen Bol Nauryz» ıdeıasynyń basty maqsaty – bastaýǵa oralý, ulttyq kod pen biregeılik tóńireginde qoǵamdy biriktirý. Biz umyt qalǵan qundylyqtardy qaıta jańǵyrtyp, ony zaman talabyna saı beıimdep, urpaqtan-urpaqqa jetkizýimiz kerek», deıdi «Senimen bolashaq» RQB quryltaıshysy Nurken Asanov.
Bıyl úshinshi ret qolǵa alynǵan 14 naýryzdaǵy kezekti shara «Senimen bolashaq» RQB Soltústik Qazaqstan oblysyndaǵy fılıalynyń tóraǵasy Janat Muhamedjanovtyń uıytqy bolýymen Petropavldyń «Green Park» saıabaǵynda ótkizildi. Qatysýshylar aldymen Naýryzdyń atqan tańyn qýanyshpen qarsy alyp, osy kúnge aman jetkenderine qýanyp, bir-birin quttyqtady. Júzderi bal-bul janǵan qatysýshylar qary áli ketpegen Qyzyljardyń tańǵy qytymyr aıazyna da qaramaı, ózderin qýanyshty sezindi.
Muny jańa rýhanı sıkldiń bastalýyn bildiretin erekshe sát dep taný kerek. Atqan jańa tań – halyqtyń birligi men ishki jańarýyn meńzeıdi. Baǵdarlama barysynda otshashý da boldy. Qonaqtarǵa shashý shashyldy. Bul – ejelgi qazaq dástúri. Árbir kámpıttiń ishinde «Senimen Bolashaq» birlestiginen izgi tilekter jasyrylyp, qatysýshylar olardy daýystap oqıdy. Osy rámizdik rásim merekege jınalǵan adamdardyń birligi men taza nıetin kórsetedi.
Kóp jyl boıy Naýryz meıramyn toılaý formaldy sıpat alyp, onyń tereń maǵynasy ýaqyt aǵymynda kómeskilenip qalǵan edi. Bul jaǵdaı halyqtyń kópǵasyrlyq mádenıetiniń bir bóliginiń joǵalýyna qaýip tóndirgen. Alaıda keıingi jyldary elimizde ulttyq kodty jańǵyrtý, rýhanı jańarý men ózindik sanany kúsheıtý úrdisi qalyptasyp, Naýryz merekesine jańasha kózqaras qalyptastyrýǵa múmkindik týdy.
Atqan tańdy qarsy alǵan qatysýshylar parktyń ishine shyrshalar otyrǵyzdy. Shyrshany qysta otyrǵyzýdyń da ózindik ádis-tásilderi bar. Eger shuqyrshaqty aldyn-ala qazyp qoısa, onyń ishi qatyp qalady. Sondyqtan shyrshany tek jańadan qazylǵan shuńqyrǵa ornalastyrady. Sonda tamyr kúsh alyp, jyly kúnder bastalǵanda jaınap shyǵa keledi. «Senimen bolashaqtyń» jastary osyny zerttep kelgen tárizdi, shyrshany jańa ǵana qazylǵan shuqyrshaqqa otyrǵyzyp, ylǵaldaný úshin jyly sý quıdy...
Qoǵamdyq birlestiktiń Qyzyljarǵa kelgen músheleri munyń aldynda «Abylaı hannyń rezıdensııasy» murajaıynda, M.Jumabaev ortalyǵynda bolyp, qalany aralady. Sonymen qatar semınar-trenıngter men strategııalyq sessııalar uıymdastyrmaqshy.
Merekelik baǵdarlamanyń taǵy bir úlgi tutarlyq elementi – eńbek sheberhanasy. Munda qatysýshylar balalarymen birge qolóner túrlerin jasap, ýaqytty paıdaly ótkizedi. Bul – birlesken eńbek arqyly tárbıeleýdiń tıimdi tásili. Odan keıin qonaqtardy «Koje Time – Naýryz» kójeni birge daıyndaý rásimi kútedi. Jeti túrli dám bir qazanǵa biriktirilip, úılesim tapqanda, ártúrli kózqarastaǵy adamdar da ortaq iske jumylady.
Merekeniń eń áserli sátteriniń biri – «Anaǵa taǵzym» rásimi. Qonaqtar ata-anasyna alǵys aıtyp, aqsaqaldardyń batasyn alady. Bul – úlkenge qurmet pen urpaq sabaqtastyǵyn dáripteıtin tereń maǵynaly dástúr.
Sondaı-aq uıymdastyrýshylar merekeniń nyshanyna, formasyna jáne tústerine de erekshe mán beredi. Sol sebepti is-sharanyń basty rámizine – qarlyǵash alynǵan. Bul qasıetti qus ejelden Naýryzdyń, jańarý men kóktemniń jarshysy sanalady. Qazaq mádenıetinde ol otbasy men shańyraqty qorǵaýshy kıeli qus retinde qurmetteledi. Naýryzda qarlyǵashtyń kelýi – qýanyshtyń belgisi. Halyq seniminde keıde marqum ata-babanyń jany qarlyǵash beınesinde úıdi qorǵaıdy dep aıtylady.
Soltústik Qazaqstan oblysy