Aqtaý mańynda apatqa ushyraǵan AZAL áýe kompanııasynyń ushaǵynda qaza tapqan jolaýshylardyń týystaryna ótemaqy tólene bastady. Bul týraly Premer-mınıstrdiń orynbasary Qanat Bozymbaev málimdedi, dep habarlaıdy Egemen.kz.
Onyń aıtýynsha, qaza tapqandardyń jaqyndarynyń birqatary ótemaqy alyp úlgergen. Keıbir otbasylarda ótemaqyny kim alatyny sot arqyly anyqtalyp jatyr.
«Qazir keıbir ister sotta qaralýda. Alaıda tólem jasaýǵa mindetti ázerbaıjandyq jáne reseılik saqtandyrý kompanııalary ótemaqy tóleýge daıyn. Jaqyn ýaqytta sheshim qabyldanady dep oılaımyn. Barlyq jolaýshy azamattyǵyna qaramastan tolyq ótemaqysyn alady», dedi Qanat Bozymbaev.
Sondaı-aq ol Qazaqstan tarapy zardap shekken azamattardyń quqyqtarynyń saqtalýyn baqylaýda ustap otyrǵanyn jáne tólem kezinde eshqandaı kemsitýshilikke jol berilmeıtinin atap ótti.
Eske salaıyq, 2024 jylǵy 25 jeltoqsanda Azerbaijan Airlines áýe kompanııasynyń ushaǵy apatqa ushyrap, 38 adam qaza tapty, olardyń ishinde Qazaqstannyń alty azamaty bolǵan.