PETROPAVL. 29 sáýir. Soltústik Qazaqstan oblysynda 38 jastaǵy kelinshek basar jeri, barar taýy bolmaǵasyn 4 ul-qyzymen orman ishindegi jerkepeni panalap otyr. Bul týraly egemtn.kz tilshisi habarlady.
Ormannan saıa tabýǵa májbúr bolǵan áıeldiń el qatarly páter jaldap turýǵa qaltasy kótermeıdi. Qurqyltaıdyń uıasyndaı baspananyń aýmaǵy-bar-joǵy 20 sharshy metr eken. Úıdiń ishi elektr qýatymen ǵana jylıdy. Balalardyń aldy 7-ge tolsa, kishisi emshekte. Mektepte oqıtyndary alty shaqyrym jerge kún saıyn jaıaý-jalpylap qatynaıdy.
Aqqý Baıdildına byltyr jeltoqsanda kenjesi Dámelini dúnıege ákelisimen erteńine birden úıine suranǵan. Sebebi, qystyń kózi qyraýda terezeden qarap, analaryn saǵyna kútip otyrǵan 3 balasynyń jaıy qabyrǵasyna qatty batqan. Kóp balaly ana ne peshi, ne sákisi joq, qabyrǵalary jup-juqa úıdi 1 mıllıon teńgege satyp alyp, alypsatarlardyń qarmaǵyna túsip qalsa kerek. Osylaısha soltústiktiń qytymyr qysyn ázer ótkizgen jaıy bar.
Aqtaýda oblystyq qarjy polısııasynda aǵa leıtenant bolyp qyzmet etken áıel qazir dekrettik demalysta. 3 jyl buryn kúıeýinen ajyrasyp, týǵan jeri Petropavlǵa kelgen. Garajyn satyp, oǵan bar jıǵan-tergenin qosyp, qaıyńdy orman ishindegi saıajaıǵa qolyn ázer iliktirgenge uqsaıdy. Jańbyr sál-pál sebelep ótse, mı batpaqqa oranǵan jolmen júrý-bir mashaqat. Balalary aýrýshań kórinedi. Páter kezeginde 2765-shi bolyp tur. Byltyr bul kezek 200 adamǵa ǵana alǵa jyljyǵan. Burynǵy kúıeýi tóleıtin alıment pen balalardyń járdemaqysyn qosqanda otbasylyq tabys 40 myń teńgeden de aspaıdy.
О́mir Esqalı.
Derekkóz: KTK arnasy.
Foto: ginner.ru.