Qazaqstan Respýblıkasynyń Memlekettik keńesshisi Erlan Qarınniń tóraǵalyǵymen Shetelde kadrlar daıarlaý jónindegi respýblıkalyq komıssııanyń kezekti otyrysy ótti, dep habarlaıdy Egemen.kz Aqordanyń resmı saıtyna silteme jasap.
Komıssııa sheshimimen «Bolashaq» halyqaralyq stıpendııasy 199 qazaqstandyqqa berildi. Endi olar magıstratýra men doktorantýrada oqıdy.
Prezıdent Qasym-Jomart Toqaevtyń «Bolashaq» baǵdarlamasyn qaıta baǵdarlaý jónindegi tapsyrmasyna sáıkes ınjenerlik-tehnıkalyq kadrlardy daıarlaýǵa basa mán berildi. Eger ótken jyly ınjenerlik-tehnıkalyq mamandyqtarǵa 36% stıpendııa bólinse, bıyl 60% bólindi.
Sonymen qatar, medısınalyq baǵyttaǵy akademııalyq baǵdarlamalarǵa úmitkerlerdiń qoljetimdiligin jáne qyzyǵýshylyǵyn arttyrý maqsatynda Respýblıkalyq komıssııa medısına qyzmetkerlerin akademııalyq oqytý úshin jeke sanat bólý týraly sheshim qabyldady.
Jalpy, bıyl magıstratýra men rezıdentýrada oqýǵa 385 stıpendııa, doktorantýra baǵdarlamalary boıynsha 60 stıpendııa bólindi. Osy jyldyń sońyna deıin Respýblıkalyq komıssııanyń taǵy eki otyrysy ótedi. «Bolashaq» halyqaralyq stıpendııasyn taǵaıyndaý konkýrsyna qatysý úshin qujat qabyldaý bıylǵy 30 mamyrda bastaldy jáne 14 qazanǵa deıin sozylady. Taǵylymdamadan ótý úshin qujat qabyldaý 2022 jylǵy 5 qyrkúıekte bastalyp, 14 qazanǵa deıin sozylady.
Jıyn qorytyndysy boıynsha Erlan Qarın birqatar naqty tapsyrma júktedi.