QOSTANAI. 29 sáýir. Qostanaı oblysy Rýdnyı qalasynda joǵalǵan qyz týraly tushymdy aqparat bergen adamǵa polısııa tarapynan 1 mln. teńge beriledi. Bul týraly «24 kz» arnasy habarlady.
Qostanaı oblysy Rýdnyı qalasynda osydan 5 kún buryn óz úıiniń aýlasynda oınap júrgen jerinen iz-tússiz joǵalyp ketken Vıktorııa Ganıa esimdi 7 jasar qyz balanyń óli-tirisi beımálim kúıde qalyp otyr. Ony izdestirý jumysy kúndiz-túni jalǵassa da eshqandaı nátıje bermeýde.
Qostanaı oblystyq ishki ister departamentiniń ókili Elena Kasharınanyń aıtýynsha, qyzdy izdestirýge 3 myńnan astam adam tartylǵan. Bulardyń deni áskerı bólim jaýyngerleri men qalalyq bilim bóliminiń qyzmetkerleri, Sokolov-Sarybaı taý-ken óndiristik birlestiginiń jumysshylary jáne eriktiler.
Izdestirý isin Qostanaı oblystyq ishki ister departamentiniń bastyǵy, polısııa polkovnıgi Tilegen Matkenov uıymdastyrýda.
Polısııa qyzmetkerleriniń aqparaty boıynsha, bul iske 30-35 jastaǵy, boıy ortasha kelgen eýropalyq er adamnyń qatysy bolýy múmkin.
Oblystyq ishki ister departamentiniń baspasóz hatshysy Ádilbek Nurmahın: «Izdeý sharalaryna polıseılerden bólek, 3 myńdaı adam tartylsa da kóńil jubatar habar bolmaı tur. Búgin Qostanaı oblystyq ishki ister departamenti Vıktorııa Ganıa týraly naqty málimetter aıtqan adamǵa 1 mln. teńge syıaqy beriletinin málimdedi. Izdeý sharalaryna áleýmettik jelilerdiń múmkindigi keńinen qoldanylýda, – dedi.
Joldybaı Bazar.
Derekkóz: «24kz».
Foto: «QazAqparat».