Ákimder jyl saıyn árbir 10 myń turǵynǵa 100 jańa jumys ornyn ashýǵa tıis. Bul týraly Memleket basshysy Úkimettiń keńeıtilgen otyrysynda aıtty, dep habarlaıdy Egemen.kz.
«Sońǵy jyldary halyqtyń tabysy birtindep ósti. Byltyr bul ósim 5 paıyz shamasynda boldy. Biraq, Almaty, Atyraý, Qyzylorda, Mańǵystaý jáne Túrkistan oblystarynda jurttyń tabysy ortasha respýblıkalyq deńgeıge jetpeıdi. Bul kórsetkish Almaty jáne Shymkent qalalarynda da tómen. Al, Qyzylorda oblysynda halyqtyń tabysy tipti azaıyp ketti. Bıyl mamyr aıynda azamattardyń naqty tabysynyń kórsetkishi mınýs 2,9 paıyz boldy. Mundaı quldyraý kópten beri bolǵan emes», dedi Prezıdent.
Onyń aıtýynsha, halyqtyń tabysyn arttyrýǵa arnalǵan baǵdarlamanyń jurtqa tıgizip jatqan paıdasy shamaly. Eń aldymen, jergilikti jerlerde tıimdi jumys júrgizilýi kerek. Ákimder jyl saıyn árbir 10 myń turǵynǵa 100 jańa jumys ornyn ashýǵa tıis.
«Meniń bilýimshe, bul baǵytta naqty nátıje joq. Taǵy da eskertemin. О́ńir basshylarynyń jumysyn baǵalaǵan kezde osy kórsetkishke basa mán beremiz. Jumys oryndaryn ashý jurttyń áleýmettik jaǵdaıyna tikeleı áser etedi. Ekonomıkanyń turaqty damýy da osyǵan baılanysty. Sondyqtan Úkimet ákimdermen birlesip, bul mindettiń qalaı oryndalyp jatqanyn taldaýǵa tıis», dedi Memleket basshysy Úkimettiń keńeıtilgen otyrysynda.