Memleket basshysy Ishki ister mınıstri Marat Ahmetjanovty qabyldady, dep habarlaıdy Egemen.kz Aqordanyń baspasóz qyzmetine silteme jasap.
Memleket basshysyna elimizdegi krımınogendik jaǵdaı, ishki ister organdarynyń bıylǵy birinshi jartyjyldyqta atqarǵan jumystarynyń nátıjeleri jóninde málimet berildi.
Prezıdentke qylmys deńgeıiniń aıtarlyqtaı tómendegeni týraly baıandaldy. Marat Ahmetjanovtyń aıtýynsha, qaraqshylyq, bopsalaý jáne mal urlyǵy faktileri azaıǵan. Qoǵamdyq oryndar men kóshelerdegi qaýipsizdik deńgeıi kóterilgen.
Mınıstrlik polısııa tergeýiniń vıdeoformatyn engizý máselesin pysyqtap jatyr. Sondaı-aq qylmystyq prosesti sıfrlandyrý isi jalǵasýda. Búginde barlyq qylmystyq quqyq buzýshylyqtyń 81,7 paıyzy elektrondyq formatta tergeledi.
Qylmystyq prosestiń úsh býyndy modelin iske asyrý aıasynda asa aýyr sanattaǵy 928 isti tergep-tekserý jumystary aıaqtalyp, sotqa joldandy. Mysaly, elordalyq polıseıler kompanııalardyń biriniń dırektoryna qatysty qylmystyq isti sotqa joldady. Ol Norvegııa Koroldigine jumysqa ornalastyramyn degen jeleýmen Qazaqstannyń 123 azamatyn aldap, 149 mıllıon teńgeden astam kólemde zalal keltirgen. Kúdikti kináli dep tanylyp, 7 jylǵa bas bostandyǵynan aıyryldy.
Sonymen qatar segiz uıymdasqan qylmystyq toptyń qyzmeti toqtatyldy. Uıymdasqan qylmystyq top qurý jáne ony basqarýǵa qatysty 16 qylmystyq is tergelip jatyr.
Esirtki qylmysyna qarsy kúres aıasynda jyl basynan beri 1354 qylmys anyqtaldy. «Qara naryqtaǵy» quny shamamen 4,5 mıllıard teńge bolatyn zańsyz aınalymdaǵy 3,5 tonna esirtki tárkilendi.
Mınıstr Memleket basshysyna Qoǵamdyq qaýipsizdikti halyqpen birlesip qamtamasyz etý jónindegi tujyrymdamanyń negizgi erejeleri týraly málimdedi.
Kezdesý sońynda Qasym-Jomart Toqaev ishki ister organdaryn sıfrlandyrý, jol apattarynyń aldyn alý jumystaryn jandandyrý mańyzdy ekenin atap ótti. Prezıdent elimizdegi qaýipsizdik pen quqyqtyq tártipti odan ári qamtamasyz etý jóninde birqatar mindet júktedi.