«Astana Operanyń» jetekshi solısi, Qazaqstannyń eńbek sińirgen qaıratkeri Baqtııar Adamjannyń óner kórsetýleriniń geografııasy jyldan jylǵa keńeıýde. Osy jazdyń ózinde ony kórermenderi álemniń birqatar elderinde kútýde. Atap aıtsaq, otandasymyzdyń qatysýymen maýsymda Mılanda 8 Gala-konsert ótti. Endi ártis Italııanyń basqa da qalalarynyń, sondaı-aq Fransııa men Aýstralııa kórermenderin tańǵaldyrýǵa daıyndalýda.
Ulttyq balet óneriniń mańdaıyna baq qusy bolyp qonǵan Baqtııardyń baǵy sol – onyń bılerin álemniń tanymal horeograftary ózderiniń balettik baǵdarlamalaryna qosýǵa asyq. Al zamanaýı ári klassıkalyq óner tabynýshylary «Qazaqstannyń №1 bıshisi» atanǵan óner ıesiniń árbir qoıylymyna barýdy armandaıdy. Týǵan jer tórinde ǵana emes, shetelde de zor tanymaldylyqqa ıe jetekshi solıst úshin bıylǵy jaz da mańyzdy oqıǵalarmen bastaldy.
Sonyń eń negizgisi – 17-28 maýsym aralyǵynda Mılandaǵy Archımboldı ıtalııalyq teatrynda ótken «Roberto Bolle jáne onyń dostary» atty zamanymyzdyń birtýar bıshisiniń gala-balet keshterinde jarqyn óner kórsetýi. Baqtııar San-Fransısko jáne Marııa teatrlarynyń jetekshi balet solısterimen birge kórermenderdiń nazaryna L.Mınkýstyń «Don Kıhot» jáne A.Adannyń «Korsar» baletterinen úzindi usyndy.
– Roberto Bollemen osydan bes jyl buryn maestro Lýıdjı Bonınonyń arqasynda tanystyq. Lýıdjı bizdiń teatrǵa Rolan Petıdiń horeografııasynda «Parıj Qudaı anasynyń sobory» spektaklin qoıýǵa kelgen bolatyn, sonda biz gala-konsertke qatar daıyndaldyq. Maestro daıyndyq zalyna kirip, jattyǵýymyzdy beınege jazyp aldy. Keıinnen sol beıneni Roberto Bollege kórsetip: «Qazaqstanda osyndaı balet ártisi bar, ol seniń «Roberto Bolle jáne onyń dostary» atty gala-konsertińde mindetti túrde óner kórsetýi kerek, bul bárimiz úshin úlken jańalyq bolady» dep meni syrttaı tanystyrǵan eken. Keıin Roberto Bolle maǵan áleýmettik jeli arqyly shyǵyp, konsertke shaqyrtý joldady. Ekeýmizdiń tanystyǵymyz osylaı bastaldy, dep Baqtııar Adamjan Mılan sapary týrasynan syr aqtardy.
Sol ýaqyttan beri Roberto Bolle Baqtııar Adamjannyń qatysýynsyz birde-bir konsert ótkizgen emes. Ekeýiniń arasyndaǵy shyǵarmashylyq dostyq jyldan jylǵa nyǵaıyp keledi. Aıta ketý kerek, Roberto Bolleniń gala-konsertterine shaqyrtý alý – bul ártistiń joǵary sheberliginiń dáleli.
– Roberto óz kórermenderin qatty qurmetteıdi. Onyń gala-konsertinde ózińdi joǵary kásibı deńgeıde kórsetpeseń, tıisti dárejeńdi saqtap turmasań, ol shyǵarmashylyq dostyqty birden short úzedi. Sebebi onyń baǵdarlamalary joǵary sapasymen erekshelenedi jáne soǵan saı ártisterine de qatań talap qoıady. Maǵan degen iltıpaty, konsertine shaqyrǵany jáne Italııanyń bedeldi sahnalarynda óner kórsetýge jaǵdaı jasaǵany úshin oǵan óte rızamyn, dep atap ótti Baqtııar Adamjan.
«Astana Opera» premeriniń Italııaǵa sapary munymen aıaqtalmaıdy. Baqtııar 21-22 shildede eki kún qatarynan Rım opera teatrynda kórermen nazaryna «Parıj Qudaı anasynyń sobory» spektaklin usynady. Balet juldyzy ıtalııalyq sahnada Kvazımodo basty partııasynda jarqyraıdy.
Sondaı-aq osy aıda Baqtııar Adamjandy ıspanııalyq kórermender de asyǵa kútedi. Ártis Alıkante qalasynyń bas teatrynda ótetin STARS GALA gala-baletinde óner kórsetedi. Aıta keteıik, bul gala-konsertte jyl saıyn álemniń shartarabynan naǵyz kásibı talanttar bas qosady. Bıyl gala-balette «Astana Operanyń» jetekshi solısimen birge bir sahnada Marııa, Úlken, Mıhaılov teatrlarynyń, Berlın, Vena memlekettik baletiniń, Nıderlandy Ulttyq baletiniń, sondaı-aq basqa da áıgili teatrlardyń úzdik ártisteri ónerlerin pash etedi. Ártister balet ónerin tereń túsinetin ári joǵary baǵalaıtyn ıspanııalyq jurtshylyqqa umytylmas áser syılaıdy dep kútilýde. Munda Baqtııar Rıkkardo Drıgonyń «Boıtumar» baletinen pa-de-de jáne Sezar Pýnıdiń «Esmeralda» baletinen «Dıana jáne Akteon» pa-de-desin usynady.
Baqtııar Adamjannyń álem boıynsha gastroldik óner kórsetýleri tamyzda Aýstralııada jalǵasady. Buǵan deıin bekzat óner padıshahy osy elde ótken Ballet International Gala álemdik shoýynda óziniń minsiz tehnıkasyn kórsetken bolatyn. Jyl basynda Jasyl qurlyq kórermenderin ónerimen tánti etip qaıtqan balet juldyzy araǵa birneshe aı salyp, «Astana Operanyń» jetekshi solısi ári óziniń sahnadaǵy juby – Shuǵyla Ádephanmen birge tamasha tandemde aýstralııalyq jankúıerlerin taǵy da qýantýǵa asyq. Odan bólek, Baqtııar 13-15 qazan kúnderi Fransııanyń Kann qalasynda óner kórsetýge de qyzý daıyndyq ústinde.
Álemniń áıgili horeograftarynyń ǵalamnyń túkpir-túkpirinde ótetin balet keshteri men spektaklderine Baqtııar Adamjandy jarysa shaqyrýy – onyń álemniń úzdik bıshileriniń qatarynda ekenin taǵy bir dáleldeı túsedi. Bul «Astana Operanyń» jáne barsha elimizdiń bedelin halyqaralyq arenada arttyratyny sózsiz. Endeshe, jahandyq óner keńistiginde laıym babyń kelisip, baǵyń jana bersin, Baqtııar!