Bas prokýratýra iri mólsherde, onyń ishinde shetelde qylmystyq tabysty zańdastyrý belgileri bar rezonanstyq isterdi tergep jatqanyn habarlady, dep jazady Egemen.kz.
Bul - Qaırat Satybaldyuly, Gúlmıra Satybaldy men Qaırat Boranbaevqa qatysty ister.
«Qazirgi ýaqytta tergeý organdarynyń qabyldaǵan sharalarymen shamamen 230 mlrd teńge memleket enshisine qaıtaryldy», delingen Bas prokýratýra habarlamasynda.
Sybaılas jemqorlyqqa qarsy qyzmet tergegen is boıynsha aıyptalýshylar óz erkimen Lıhtenshteınnen 170 mln dollardan astam aqshany qaıtardy.
«Qazaqtelekom» AQ, «Kóliktik servıs ortalyǵy» AQ múlkin urlaý týraly ister boıynsha tergeý organy shamamen 36 mlrd teńge óńdirdi.
Qarjy monıtorıngi agenttigi Boranbaevqa qatysty isti tergeý barysynda 11,3 mlrd teńge ótegenin habarlady.
Eske sala ketsek, 13 naýryzda Qaırat Satybaldyuly ustaldy. Al 17 naýryzda Qarjy monıtorıngi agenttiginiń baspasóz qyzmeti qazaqstandyq kásipker Qaırat Boranbaevtyń ustalǵanyn málimdedi. Agenttik kvazımemlekettik sektorda asa iri mólsherde qarajat urlaý faktisi boıynsha qylmystyq isti tergeýde.
Qaırat Satybaldyulynyń burynǵy áıeli Gúlmıra Satybaldy Ýnıversıada-2017 nysandaryn jóndeýge baǵyttalǵan qarajatty urlady degen kúdikke ilinip,16 naýryzda ustalǵan bolatyn.
Aıta keteıik, osy jyldyń 5 maýsymynda Prezıdenttiń Jarlyǵymen ekonomıkalyq resýrstardy zańsyz shoǵyrlandyrýǵa qarsy is-qımyl máseleleri jónindegi komıssııa quryldy.