Dúnıejúzilik densaýlyq saqtaý uıymynyń Eýropalyq bıýrosynyń basshysy Hans Klıýge koronavırýstyń omıkron shtammynyń kishi nusqalarynan týyndaǵan COVID-19-dyń jańa tolqyny týraly habarlady. Ol Eýropa elderin vaksınasııa men betperde taǵýǵa qatysty jedel sharalar qabyldaýǵa shaqyrdy, dep habarlaıdy Egemen.kz COVID-19 taralýyna jol bermeý jónindegi vedomstvoaralyq komıssııaǵa silteme jasap.
DDU ókiliniń aıtýynsha, sońǵy alty aptada Eýropa óńirinde koronavırýs ınfeksııasyn juqtyrýdyń jańa jaǵdaılarynyń sany úsh ese ósti. Al ótken aptada 3 mıllıonǵa jýyq jańa jaǵdaı tirkeldi, bul álemdegi barlyq jańa ınfeksııalardyń jartysyna jýyǵyn quraıdy. Klıýge sýyq aýa raıy jaqyndaǵan saıyn koronavırýs qarqyndy taralatyndyǵyn aıtty.
«Búgin DDU-nyń Eýropalyq aımaqtyq bıýrosy ınfeksııanyń aldaǵy tolqyndaryna daıyndalýǵa kómektesý úshin koronavırýs jáne basqa da tynys alý vırýstarymen kúresýdiń kúzgi-qysqy strategııasyn jarııalady. Áreket etý úshin kúzdiń kelýin kútsek, tym kesh bolady», dedi bıýro dırektory. Strategııa, atap aıtqanda, halyqty vaksınasııamen qamtýdy ulǵaıtýdy, úı-jaılarda jáne qoǵamdyq kólikte betperde taǵýǵa yntalandyrýdy, jabyq úı-jaılardyń jeldetilýin kúsheıtýdi kózdeıdi», dedi ol.