Irak astanasy Baǵdadta júzdegen ereýilshi parlament ǵımaratyna basyp kirip, saıası jáne dıplomatııalyq ǵımarattar ornalasqan aýmaqqa ótti, dep habarlaıdy Egemen.kz Deutsche Welle saıtyna silteme jasap.
As-Sadr Mýktadanyń jaqtastary Irannyń qolshoqpary dep sanaıtyn qarsylasy Muhammed as-Sýdanıdi eldiń premer-mınıstri etip taǵaıyndaý josparyna narazylyq bildirip otyr.
27 shildede Irak óziniń antırekordyn jańartyp, 290 kún tolyqqandy úkimet bolmady. Aldyńǵy rekord - 289 kún, ol 2010 jyly bolǵan. As-Sadr basqaratyn sadrıstik qozǵalys toǵyz aı buryn, ótken jyldyń qazan aıynda ótken saılaýda salystyrmaly basym daýysqa ıe bolǵan, biraq jańa mınıstrler kabınetin qurý jónindegi kelissóz búkil shııt jáne kúrd toptarynyń ymyraǵa kele almaýy sebebimen áli de bılikke kele almady.
Parlament ǵımaraty Baǵdadtyń áıgili qatań kúzetiletin «jasyl aımaqta» ornalasqan. Polıseılerdiń kózden jas aǵyzatyn gaz ben sý atqysh qoldanǵanyna qaramastan, qaýipsizdik qyzmetkerleri sadrıstik topty toqtata almady. Bul kezde parlament ǵımaratynda birde-bir depýtat bolǵan joq. Saılaýdan keıin aýystyrylýyn toǵyz aı boıy kútken premer-mınıstrdiń mindetin atqarýshy Mustafa ál-Qadımı narazylyq bildirýshilerdi ǵımarattan ketýge shaqyrdy, biraq sadrıster ony tyńdamaı, shý shyǵaryp, jalaý jelbiretýdi, án aıtýdy jalǵastyrdy.
Elde tolyqqandy úkimettiń bolmaýy Irakty bıyl bekitilgen bıýdjetsiz, al ınfraqurylymdyq jobalar men reformalaryn qarjylandyrýsyz qaldyrdy.
Mýktada as-Sadrdyń jaqtastary 2016 jylǵy tártipsizdik kezinde de parlamentke basyp kirgen.
2019 jyly Irakta kópshiliktiń sybaılas jemqorlyq, jumyssyzdyq pen kedeılikke qarsy narazylyq bildirýi kezinde áldeqaıda aýyr tártipsizdik bolyp, júzdegen adam qaıtys boldy.