Semeıde qoǵamdyq avtobýstardyń qyzmeti syn kótermeıtini kópke málim. «Semavtopark» kásiporny ókilderimen kezdesken Abaı oblysynyń ákimi Nurlan Uranhaev, ásirese avtobýstardyń jumys ýaqyty kóńil kónshitpeıtinin jetkizdi.
Oblys ortalyǵyndaǵy qoǵamdyq kólikterdiń máselesi laıyqty sheshim tappaı kele jatqanyna biraz boldy. Aıtalyq, kez kelgen semeılikten surasańyz, baǵyttaǵy avtobýstardyń azdyǵyna, júrgizýshiler men kondýktorlardyń qyzmetine shaǵymdana jóneledi.
Jol aqysyn tóleý rásimi bir izge túsirilmegeni de halyqqa qolaısyz. Eger de keıbir avtobýstarda jol aqysyn qolma-qol aqshamen tóleýge týra kelse, basqalarynda kólik kartasy qabyldanady. Osy jáne avtobýstardyń marshrýttardan erte shyǵyp ketýi jaıly óńir basshysy jolaýshylardy tasymaldaıtyn kompanııa ókilderine aıtyp, máseleni jyldam retteýdi tapsyrdy.
«Avtobýstar jumysyn erte aıaqtaıtynyn eskersek, keıbir qoǵamdyq oryndarǵa da belgilengen ýaqyttan buryn jumystaryn toqtatýǵa týra keledi. Bul meıramhanalar nemese basqa da oıyn-saýyq ortalyqtaryna qatysty emes. Másele halyq serýendeıtin qalalyq saıabaqtarda bolyp tur. Aıtalyq, jeke ózim saıabaqqa baryp, onyń 19.30-da jabyq turǵanyn baıqadym. Nege? О́ıtkeni bul ýaqyttan kesh qalsa adamdar úılerine jete almaı qalady», dedi N.Uranhaev.
«Semavtopark» JShS-nyń dırektory Grıgorıı Pınchýk bul máseleden habardar ekenin aıta kele jýyq arada ony sheshýdiń joldaryn qarastyratynyn jetkizdi.
«Biz qyzmetkerlerdiń jalaqysyn kóterý men keshki ýaqyttarda avtobýstardyń sanyn ulǵaıtýǵa baılanysty usynystardy pysyqtadyq», dedi G.Pınchýk.
Oblys ákimi bul másele qala úshin mańyzdy bolǵandyqtan ony mindetti túrde sheshý kerek ekenin jetkizdi. «Jalaqyny kóterip, marshrýt sanyn ulǵaıtýmen birge avtobýstardyń qozǵalys kestesin uzartqan durys. О́z tarapymyzdan jyly aıaldamalardyń máselesimen aınalysamyz», dedi N.Uranhaev.
Abaı oblysy