Elordadaǵy Ulttyq akademııalyq kitaphanada Monýmenttik óner qurylystaryn ornatý jónindegi komıssııa otyrysy ótti. Oǵan Mádenıet jáne sport mınıstri Dáýren Abaev qatysty. Jıynda sarapshylar monýmentaldy óner salasyndaǵy ózekti máselelerdi de talqylady.
Basqosýda quramyna belgili músinshiler, sýretshiler, zergerler, ǵalymdar men qoǵam qaıratkerleri kiretin Monýmenttik óner qurylystaryn ornatý jónindegi komıssııa respýblıkalyq konkýrstyń qorytyndysy boıynsha jobalaý jumystaryn qarap, maquldady.
Naqtyraq aıtqanda, aldaǵy ýaqytta Qostanaı oblysy Jangeldın aýdany Torǵaı aýylynda alashtyń qos arysy Ahmet Baıtursynuly men Mirjaqyp Dýlatulyna eskertkish turǵyzylady. Sondaı-aq Almatyda ult ustazy Ahmet Baıtursynulyna eskertkish ornatylsa, kórnekti rejısser, teatr qaıratkeri Jumat Shanınge bıýst qoıylady.
«Eskertkishter – tarıhı jadymyzdy jańǵyrtýda jáne qoǵamdyq sanany qalyptastyrýda erekshe mánge ıe. Sondyqtan josparlaýdan bastap eskertkishterdi ornatqanǵa deıingi jumysqa muqııat qaraý óte mańyzdy. Komıssııa toby músinderdiń jumsaq materıaldan jasalǵan tolyq kólemdegi nusqasyn jan-jaqty qarastyrýy qajet», – dedi Mádenıet jáne sport mınıstri Dáýren Abaev.
Sonymen qatar komıssııa músheleri Jambyl, Qaraǵandy, Qostanaı, Túrkistan jáne Ulytaý oblystary ákimdikteriniń ıdeıalyq usynystaryn biraýyzdan qoldady. Atalǵan óńirlerde Qazaqstannyń halyq jazýshysy Sherhan Murtazaǵa, aqyn, memleket jáne qoǵam qaıratkeri Kákimbek Salyqovqa, Nııaz batyr Saıdaly Barqyulyna, II Dúnıejúzilik soǵys jáne eńbek ardageri Jaqsybek Ońshybaevqa jáne túrik saıasatkeri, memleket qaıratkeri Adnan Menderske arnalǵan eskertkishterdi jobalaý josparlanǵan.