Soltústik Qazaqstan oblysynda ıgerilmeı qalǵan 18,9 myń gektar jer memleket menshigine qaıtaryldy. Bos jatqan shabyndyqtar men jaıylymdar endi aýyl turǵyndarynyń qoldanysyna beriledi, dep habarlaıdy Egemen.kz.
«AMANAT» partııasynyń SQO boıynsha fılıaly málim etkendeı, partııa janyndaǵy «Jer amanaty» komıssııasynyń kóshpeli otyrysy ótti. Jıynda óńirde bos jatqan jerlerdi qaıtarý boıynsha atqarylǵan jumystar qorytyndylandy.
Atap aıtqanda, SQO Aqjar aýdanynda memleket menshigine 11 myń ga, Qyzyljar aýdanynda 4,2 myń ga, Jambyl aýdanynda 2,5 myń ga, Ǵ.Músirepov atyndaǵy aýdanda 800 ga jáne Mamlıýt aýdanynda 400 ga jer qaıtaryldy. Buǵan qosa, Aıyrtaý, Taıynsha, M.Jumabaev aýdandarynda mal jaıý úshin 29 myń ga jaıylym jerdi halyqqa óteýsiz berý jóninde aýyl sharýashylyǵy qurylymdarymen memorandým jasaldy.
«Kartadaǵy taldaý jumystary barlyq aýdanda sheshilmegen jer máselesi bar ekendigin kórsetti. Sonyń kesirinen keıbir paı ıeleri máseleni sheshý múmkin emes dep oılap, qalaǵa kóship ketti. Kóbisi sot prosesinde utylyp, bizge júginedi. Basqalary JShS tarapynan qysym kóredi. Komıssııanyń búgingi mindeti – jerdi bir JShS-den alyp, ekinshisine berý emes. Bizdiń mindetimiz – jer qatynastary salasyndaǵy zań ústemdigi men ádildikti qalpyna keltirý. Biz túrli prosesterge yqpal etip, zańǵa kóptegen túzetýler engize alamyz», dedi «Jer amanaty» komıssııasy tóraǵasynyń orynbasary ári zańger Baqytjan Bazarbek.
Komıssııa múshesi, qoǵam qaıratkeri Murat Ábenov qoldanystaǵy sharýa qojalyqtarynyń tıimsizdigine nazar aýdardy.
«Mysaly, adamdardyń bir bóligi qalada turady. Jalǵan qujat jasaý, jınalys ótkizbeý arqyly jerdi bir kompanııadan ekinshi kompanııaǵa berip jibergen sharýashylyqtar bar. Sot isi bolady. Shyn máninde, jer áýel bastan-aq ıgerý, paıdalaný úshin alynbaǵany túsinikti. Qujattardaǵy shatasýlar aqyr-sońynda jerdiń qunaryn ketirip, sapasyn tómendetip tynady. Bul aınalyspasa bolmaıtyn asa mańyzdy másele», dedi ol óz sózinde.
Beloe aýylynyń turǵyny, agronom-ǵalym Svetlana Gaýktyń aıtýynsha, sharýashylyqtardyń kimge tıesili ekenin bilý úshin ortaq karta jasaý kerek. Bul karta turǵyndardyń jerge kim ıelik etetinin jáne naqty qaı jerdi ıelenip otyrǵanyn kóre alýy úshin qajet.
Sol kúni partııanyń Petropavldaǵy oblystyq fılıalynda «Jer amanaty» komıssııasynyń músheleri azamattardy qabyldady. О́tinish bildirgenderdiń basym kópshiligi – jerinen aıyrylyp qalǵan adamdar. Onyń arasynda Aıyrtaý, Aqjar, Jambyl jáne Shal aqyn aýdandarynyń turǵyndary boldy. Jer máselesimen komıssııaǵa óńirdiń 60-tan astam turǵyny júgindi. Barlyq másele partııalyq baqylaýǵa alyndy.