Almaty oblysy Jańalyq aýylyndaǵy «Ashtyq jáne saıası qýǵyn súrgin qurbandaryna» arnalǵan mýzeıde Abaıdyń qýǵyn-súrginge ushyraǵan urpaqtary jaıynda syr shertilgen kesh ótti, dep habarlaıdy Egemen.kz.
Keshte Abaı kúnine oraılastyrylyp, «Abaıdyń aqyn uldary» atty eńbektiń tusaýy kesilip, oqyrmanǵa jol tartty. Kitapta dala danyshpanynyń talantty uldary Aqylbaı, Maǵaýııa jáne Turaǵul jáne nemeresi Áýbákir Aqylbaıuly jaıly zertteýler zerdelengen.
Aıta ketsek, tuńǵyshy Aqylbaı men Maǵaýııa aty áıgili bir talaı kórkem dastan poemalardy jazǵan. Al Turaǵul qara sózdiń has sheberi bolǵan. Budan bólek aýdarmashylyǵy da bir tóbe. Nemeresi Áýbákirdiń óleńderinde Abaı úlgisi saırap jatyr. Ol satıralyq óleńderimen birge tarıhı shyǵarmalarǵa bet buryp, kólemdi dastandar jazǵan.
Keńestik keri saıasattyń tas qursaýy kemeńger urpaqtaryn da aınalyp ótpegen.
«Búgingi sharanyń bul mýzeıde ótýi de tegin emes. Men biletin Abaıdyń nemere inisi Shákárimnen bastap, 14 urpaǵy qýǵyn kórgen. Qysqasy, Keńes ókimeti Abaı urpaqtaryna teris qaraǵan. Al endi búgingi jastar Abaı armandaǵandaı bilimdi bilikti bolý kerek qoı», dep atap ótti jazýshy Bolat Júnisbekov.
Shara sońynda qonaqtar mýzeıdi aralap, eksponat esteliktermen tanysty.
Almaty oblysynda «Abaı ánderi» atty «Úshqońyr» folklorly-etnografııalyq ansambliniń konserti, «Úmbetáli jyrlaryndaǵy – Abaı beınesi» atty jıyny, «Hantáńiri» halyq teatrynyń «Telǵara» fılm-spektakliniń qoıylymy, «Abaı – jyrshy, uly aqyny elimniń» atty poezııa keshi syndy sharalar 17 tamyzǵa deıin jalǵasyn tappaq.