QYZYLORDA. 7 mamyr. Búgin tańǵy saǵat 9-dar shamasynda «Batys Eýropa- Batys Qytaı» tas jolynyń Shıeli aýdany, Tartoǵaı eldi mekeni mańynda jol apaty oryn alyp, ol 10 adamnyń ómirin úzip ketti. Bul týraly Qyzylorda oblystyq ishki ister departamenti baspasóz qyzmetiniń deregine silteme jasaǵan egemen.kz tilshisi habarlady.
Apat Ońtústik Qazaqstan oblysyna qaraı bet alǵan «Mersedes Sprınter» shaǵyn avtobýsy men Qyzylorda qalasyna kele jatqan «Toıota Land Krýzer Prado» avtokóligi bir-birimen bet-bet soqtyǵysýy nátıjesinde oryn alǵan. Málimet boıynsha, eki kólikte barlyǵy 19 adam otyrǵan. Bulardyń arasynan 10 jolaýshy, onyń ishinde eki kóliktiń de júrgizýshileri qaza tapqan. Bulardan basqa, aýyr jaralanǵan 6 adam aýdandyq aýrýhanaǵa, 2 adam oblystyq medısına ortalyǵyna jedel jetkizildi.
Kólik apaty týraly aqparat kelip túsken bette oqıǵa ornyna birden quramynda neırohırýrg, travmatolog, hırýrg jáne basqa da dárigerler bar 2 oblystyq jáne 2 aýdandyq reanımobıl bardy. Budan bólek, apat ornynda tótenshe jaǵdaılar departamenti men ishki ister departamentiniń mamandary jáne tehnıkalary jumys isteýde.
Oblys ákiminiń tapsyrmasymen onyń orynbasary Nurjan Álibaev pen Shıeli aýdanynyń ákimi Qaıratbek Sársenbaev oqıǵa ornyna baryp, tıisti organ basshylarynyń qatysýymen shuǵyl shtab otyrysyn ótkizdi.
Qazir jol kólik oqıǵasyna baılanysty qylmystyq is qozǵalyp, sebepteri anyqtalý ústinde.
Qurysh Nurymbet.
Derekkóz: Qyzylorda oblystyq ishki ister basqarmasynyń baspasóz qyzmeti.
Foto: www.pro-goroda.ru.