Egemen qazaq eliniń mádenı ómirinde ótken tarıhymyzdy, mádenıetimizdi kórsetetin mýzeılerdiń róli erekshe. Halyq arasynda saqtalǵan qundy muramyz, qolóner buıymdary, kitaptar, qoljazbalar qaı zamanda da óz mańyzyn joǵaltqan emes.
Negizi qalanǵanyna 50 jyldan asqan Túrkistan oblysy, Otyrar aýdany, Sháýildir aýylyndaǵy Otyrar memlekettik arheologııalyq mýzeı-qoryǵyna osy ýaqytqa deıin jádigerler arheologııalyq, etnografııalyq ǵylymı-zertteý ekspedısııalary, arheologııalyq qazba jumystary barysynda, ǵalymdardyń, óner adamdarynyń, qolóner sheberleriniń, jádiger janashyrlarynyń mýzeıge syıǵa tartýymen jınalǵan. Osy úrdis qazir de jalǵasyn taýyp keledi. Mádenıet jáne sport mınıstrligine qarasty Otyrar memlekettik arheologııalyq mýzeı-qoryǵynyń uıymdastyrýymen «Mýzeıge syı» aksııasy ótip turady, onyń maqsaty el arasynan kóne muralardy jınastyrý, tarıhı-mádenı qundylyqtarymyzdy saqtaý máselesine kóńil bólý, kásibı turǵyda zattyq jáne rýhanı muramyzdy saqtaý. Alǵashqyda mýzeıde 2000 jádiger bolsa, qazirgi tańda 25000-nan asty.
«Mýzeıge syı» aksııasynda mádenıet janashyrlary arheologııalyq, etnografııalyq birneshe zattardy mýzeıge tabystap keledi. 2022 jyldyń tamyz aıynda mýzeı qoryn tolyqtyrý maqsatynda Túrkistan oblysy, Otyrar óńirinde «Qolóner-halyq qazynasy» taqyrybynda etnografııalyq ǵylymı-zertteý ekspedısııasy uıymdastyrylǵan edi. Ekspedısııa barysynda tabylǵan zattardyń ishinde kilemge erekshe toqtalýdy jón kórdim. Buǵan deıin de kilem týraly birneshe maqalalar jarııalanǵan edi. Tarıhy tereń jádigerdi qolóner sheberi Quttyǵyz Seralıeva apadan alyp Otyrar memlekettik arheologııalyq mýzeı-qoryǵynyń aǵa ǵylymı qyzmetkeri Qalıpa Kemelova mýzeı qoryna ótkizdi. 80 jasqa kelgen Quttyǵyz apa ǵumyrynyń 65 jylǵa tarta ýaqytyn qolóner buıymdaryn jasaýǵa arnaǵan qolóner sheberi. Atadan balaǵa mıras bolyp kele jatqan kilemdi urpaqtan-urpaqqa áýlettiń qasterli zaty retinde saqtap kelgen. Kilem jarty ǵasyrǵa jýyqtasa da ári ketpegen, óte berik bolyp toqylǵan. Kilem toqý óneri erte zamanda paıda bolǵandyǵy arheologııalyq qazba jumystarynan belgili. Kilem betindegi san qıly sándik órnekterge nazar salǵan adam sol halyqtyń tunyp turǵan shejiresin kóretini anyq.
Aqlıma JUMAShOVA,
Otyrar memlekettik arheologııalyq mýzeı-qoryǵynyń bólim meńgerýshisi