Elimizde koronavırýs ınfeksııasyn juqtyrý kórsetkishi aıtarlyqtaı tómendep, keıingi táýlikte 740 adamnan indet anyqtaldy. Qazir barlyq óńirimiz «jasyl aımaqta» tur. Degenmen jaǵdaı ońaldy eken dep arqany keńge salmaı, saqtyq sharalaryn ustanýdy umytpaǵan jón. О́ıtkeni aramyzdan áli irgesin ajyratpaǵan indettiń qaıta kúsheıip ketýi qaýpi bar ekenine ábden kóz jetti.
20 tamyzdaǵy derek boıynsha PTR synamalarynyń nátıjesinde KVI aýrýyna ushyraǵan 740 adam tirkeldi. Bulardyń ishinde eń kóp naýqas Nur-Sultan qalasynda (126) jáne Qaraǵandy oblysynda (109) anyqtaldy. Bul óńirlerde jaǵdaıdyń odan saıyn ýshyǵyp ketpeýi qatań baqylaýǵa alynyp otyr. Onyń ústine jaqynda ǵana «sary aımaqtan» arylǵan astanadaǵy ahýaldy qaıtadan nasharlatyp almaý mańyzdy.
Koronavırýs ınfeksııasynan aıyǵyp, beti beri qaraǵan adamdardyń qatary kóbeıip keledi. Keshe ǵana 572 adam jazylyp shyqty. Olardyń 191-i Qaraǵandy oblysynan bolsa, 97-si – Almaty qalasynan. Jalpy, indet bastalǵaly elimizde osy dertke shaldyqqan 1 348 271 adam emdelip, saýyǵyp shyqty.
Qazir 21 925 adam KVI aýrýynan emdelip jatyr. Olardyń ishinde 917 naýqas stasıonarda, 21 008 naýqas ambýlatorııalyq deńgeıde em qabyldaýda. Indetke shaldyqqandardyń arasynda 38 adamnyń jaǵdaıy aýyr, 4 adamnyń jaǵdaıy óte aýyr, 5 naýqas О́JJ apparatynda jatyr.
Koronavırýstan saqtanýdyń eń negizgi joly vaksına saldyrý ekeni túsinikti. Bul rette Qazaqstanda vaksınanyń birinshi komponentin 9 578 192 adam, ekinshi komponentin 9 358 785 adam saldyrdy. Al Pfizer vaksınasynyń birinshi dozasyn 1 238 084 adam, ekinshi dozasyn 1 195 162 adam qabyldady. Onyń ishinde jasóspirimder – 874 105, júkti áıelder – 41 603, besiktegi balasy bar áıelder – 145 377.