Týrızm áleýetin arttyratyn «Almaty Superski» jobasyna arnalǵan qoǵamdyq tyńdaý ótti. Is-shara barysynda týrızm salasyn damytý, Almaty taý klasteriniń áleýeti jáne halyqaralyq deńgeıdegi taý týrızmi ortalyǵyn qalyptastyrý máseleleri talqylandy. Basqarma tóraǵasy Talǵat Ǵazızov óz sózinde Qazaqstandaǵy týrızm salasynyń keıingi jyldary turaqty ósim kórsetip otyrǵanyn atap ótti, dep habarlaıdy Egemen.kz.
Onyń aıtýynsha, ótken jyly el ishinde qonaqúılerge ornalasqan týrıster sany 8,6 mıllıon adamǵa jetken. Sonymen qatar, elimizdegi ornalastyrý nysandarynyń sany artyp, týrıstik ınfraqurylym keńeıip keledi.
Spıker Almatynyń Qazaqstandaǵy negizgi týrıstik jáne halyqaralyq áýe haby retindegi mańyzyna erekshe toqtaldy. 2025 jyldyń qorytyndysy boıynsha qaladaǵy qonaqúıler men ornalastyrý oryndary shamamen 2,5 mıllıon týrıstke qyzmet kórsetken. Onyń ishinde 1,7 mıllıon adam – ishki týrıster bolsa, 754 myńnan astamy – sheteldik qonaqtar.
Búginde Almaty halyqaralyq naryqtaǵy pozısııasyn nyǵaıtyp keledi. Qala Ortalyq Azııadaǵy áýe qatynasy eń damyǵan megapolıs sanalady ári Bloomberg pen CNN nusqasy boıynsha álemdegi úzdik 25 týrıstik baǵyttyń qataryna engen.
Keıingi jyldary Almatyǵa keletin týrısterdiń demalys uzaqtyǵy da artqan. Sheteldik qonaqtardyń shyǵyny 40 paıyzǵa kóbeıip, tabıǵı, taý jáne mádenı týrızmge qyzyǵýshylyq joǵarylaǵan. Týrısterdiń basym bóligi qalaǵa demalys pen belsendi saıahat maqsatynda keledi.
Jıynda Almaty taý klasteriniń Qazaqstan týrızmindegi strategııalyq mańyzy erekshe aıtyldy. Búginde klasterge jyl saıyn shamamen 3 mıllıon týrıst keledi. Onyń ishinde 2,2 mıllıony – otandyq, al 764 myńy – sheteldik týrıster. Klaster aıasynda kórsetiletin qyzmet kólemi 199 mıllıard teńgege jetken.
Taý klasteriniń negizgi nysandarynyń biri – Shymbulak Mountain Resort. Byltyr kýrortqa kelýshiler sany 1,4 mıllıonǵa jetken. Mamandardyń aıtýynsha, halyqaralyq týrısterdiń Almatyǵa degen qyzyǵýshylyǵynyń 80 paıyzy tabıǵatpen, taýmen jáne belsendi demalyspen baılanysty.
Aıda Balaeva: Almaty Superski taýdaǵy týrızmdi damytýdyń úlgisine aınalýǵa tıis
Sondaı-aq sarapshylar Qytaı men Reseı naryǵyn taý shańǵysy týrızmin damytýdaǵy negizgi baǵyttardyń biri retinde atap ótti. Qytaıda 12,8 mıllıonnan astam shańǵyshy bar bolsa, Reseıde bul kórsetkish 3,6 mıllıon adamǵa jetedi. Osy naryqtyń az ǵana bóligin tartýdyń ózi Qazaqstanǵa keletin týrıster sanyn aıtarlyqtaı arttyra alady.
Joba aıasynda halyqaralyq sporttyq jarystar, mádenı festıvalder, konsertter men iskerlik forýmdar ótkizý múmkindigi de qarastyrylyp otyr. Bul Almatyny Ortalyq Azııadaǵy taý jáne iskerlik týrızm ortalyǵyna aınaldyrýǵa jol ashpaq.
Qoǵamdyq tyńdaýda Ortalyq Azııa men Kavkaz elderindegi básekelestikke de nazar aýdaryldy. Qyrǵyzstandaǵy «Úsh shyń», О́zbekstandaǵy Amirsoy, Ázerbaıjandaǵy Shahdag jáne Grýzııadaǵy Gudauri sekildi iri taý kýrorttary búginde qarqyndy damyp keledi. Osyǵan baılanysty Almaty taý klasterin damytý Qazaqstannyń aımaqtaǵy týrıstik kóshbasshylyǵyn saqtaýda mańyzdy qadam retinde baǵalanyp otyr.
Spıkerdiń aıtýynsha, álemdik tájirıbede taý shańǵysy ınfraqurylymyna salynǵan árbir dollar qosymsha ınvestısııa tartýǵa múmkindik beredi ári myńdaǵan jańa jumys ornyn ashady. Týrısterdiń shyǵyny da basqa demalys túrlerimen salystyrǵanda áldeqaıda joǵary.
Mınıstr: Almaty Superski naqty erejeleri bar qoǵamdyq ınfraqurylym retinde damýy tıis
Aıta keteıik, byltyr jeltoqsanda Úkimet Almaty taý klasterin 2025-2029 jyldary damytýǵa arnalǵan keshendi jospardy bekitti. Qujat 73 is-sharany qamtıdy. Jospar aıasynda kólik jáne ınjenerlik ınfraqurylymdy jańartý, ınvestısııa tartý, qaýipsizdik, sıfrlandyrý jáne týrıstik aımaqtardy abattandyrý kózdelgen.
2029 jylǵa qaraı sheteldik týrıster sanyn 1,7 mıllıon adamǵa jetkizý, týrızm salasyndaǵy jumyspen qamtýdy 102 myń adamǵa deıin arttyrý jáne 240 mıllıard teńge kóleminde jeke ınvestısııa tartý josparlanyp otyr. Sonymen qatar, taý klasteriniń ótkizý qabileti táýligine 24 myń adamǵa deıin ulǵaıyp, taý shańǵysy trassalary men aspaly joldar sany kóbeımek.
Eske salaıyq, buǵan deıin qoǵamdyq tyńdaýlar bastalǵanyn habarlaǵanbyz.