Almaty qalalyq máslıhaty turaqty komıssııalarynyń tóraǵalary, depýtattar, partııa fraksııalarynyń jetekshileri Memleket basshysynyń «Ádiletti memleket. Birtutas ult. Berekeli qoǵam» atty Qazaqstan halqyna Joldaýyna qoldaý bildirip, qujatta aıtylǵan mindet-usynystardy iske asyrý basymdyqtaryn talqylady.
Memlekettiń basty qundylyǵy – adam. Al eldiń turaqty damýy ulttyń saýlyǵy men sapaly bilimine tyǵyz baılanysty. Joldaý kótergen mańyzdy baǵdar áleýmettik saıasatty jetildirip, ekonomıkalyq turaqtylyqqa qol jetkizýdi kózdeıdi. Osy oraıda jıyn moderatory, Almaty qalalyq máslıhatynyń hatshysy Stanıslav Kankýrov el damýynyń keleshegin aıqyndaıtyn qujattyń saıası-ekonomıkalyq mańyzyna toqtaldy. Bes baǵdardan turatyn strategııalyq qujat elimiz aımaqtarynda qordalanǵan kókeıkesti máselelerdi taıaý ýaqytta sheship, respýblıka jurtshylyǵyna qolaıly jaǵdaı jasaýdy maqsat etedi. Eldi mekenderde medısına mekemelerin kóbeıtip, qoljetimdiligin arttyrý, sonymen qatar aýyl sharýashylyǵyna, shaǵyn jáne orta bızneske kóńil bólý, salyq júıesin jetildirýmen qatar Ulttyq qordyń ıgiligin kórý, makroekonomıkalyq turaqtylyqqa qol jetkizip, adamı kapıtaldyń damýyna, zań ústemdigin ornatýdyń mańyzyna nazar aýdaryp otyr. Osy oraıda S.Kankýrov «Elimizdegi saıası ózgeristerdi júıeli iske asyrý men turaqty damý jolyna baǵyttalǵan Joldaýdy júzege asyrýǵa qoldaý bildiremiz», dep atap ótti.
Máslıhattyń Qoǵamdyq damý, mádenıet, sport, din jáne jastar jónindegi komıssııasy tóraǵasynyń orynbasary Kenjehan Matyjanov Joldaýdaǵy áleýmettik basymdyqtarǵa nazar aýdardy. Naryqtyq ekonomıka jaǵdaıynda makroekonomıkalyq turaqtylyqqa qol jetkizý, básekelestikti arttyrý, salyq saıasaty, zańnamalardy jetildirýdiń mańyzdy ekendigine toqtalǵan sarapshy ekonomıkalyq saıasattyń ashyqtyǵy, jemqorlyqpen kúreste sıfrlandyrý salasyn damytýdyń mańyzyn atap ótti. «Ásirese «Halyq qatysatyn bıýdjet» jobasynda sıfrlandyrý saıasaty tıimdiligin kórsetti. Bul jobaǵa jurtshylyqtyń, qoǵamdyq uıymdardyń aralasyp otyrǵany qýantady. Al bilimdi, deni saý urpaq – eldiń keleshegi. Joldaýda bilim men densaýlyq salasyna aıryqsha kóńil bólinip otyrǵany da sondyqtan», dedi K.Matyjanov. Mektepke deıingi bilim, tárbıe jumysy, tárbıeshilerge kóńil bólý máselesine toqtalǵan sarapshy Fınlıandııa elinde balabaqsha tárbıeshisine mamandanýdyń talaby joǵary ekendigine nazar aýdardy. Bul elde tárbıeshilerdiń jalaqysy joǵary, áleýmettik jaǵdaıy da jaqsy. Eki, úsh aýysymdy mektepterdiń Eýropa elderinde joq ekenin aıtqan ol Joldaý júktegen mindetter júzege asatyn bolsa, bilim salasynda qordalanǵan máseleler sheshimin tabatynyn atap ótti.
«Búginde elimizde 650 eldi mekende emdeý mekemesi joq. Qazirgi jaǵdaıda elimizdiń shalǵaı aımaqtarynda densaýlyq salasyn damytý, medısınalyq mekemelerdiń sanyn arttyra otyryp, turǵyndarǵa sapaly medısınalyq kómek kórsetý ýaqyt kúttirmeıdi». Prezıdent Joldaýynda aıtylǵan basymdyqtar júzege asatyn bolsa, eldi mekenderde qoljetimdi medısına damyp, zamanaýı jaraqtalǵan emhanalar men aýrýhanalar boı kóteredi. «Bul Jańa Qazaqstandy qurýǵa baǵyttalǵan mańyzdy qadam», dep atap ótti máslıhattyń Densaýlyq saqtaý, bilim jáne jumyspen qamtý jónindegi komıssııa tóraǵasy Bolat Sadyqov.
Kásipkerlik, ınvestısııalar, týrızm, jer qatynastary jáne ekologııa jónindegi komıssııa tóraǵasy Fedor Konstantınov, Kommýnaldyq ınfraqurylym, qalalyq mobıldik, qurylys, sáýlet jáne ýrbanıstıka, energetıka jáne sýmen jabdyqtaý jónindegi komıssııa tóraǵasy Nursultan Shoqanov, Ekonomıka, qarjy, aktıvter, memlekettik basqarýdy damytý jáne qoǵamdyq qaýipsizdik jónindegi komıssııasy tóraǵasynyń orynbasary, «Aýyl» partııasynyń Almaty qalasy boıynsha fılıalynyń jetekshisi Mahambet Hasenov bolashaqqa arnalǵan mańyzdy qujatta shaǵyn jáne orta kásipkerlikti, aýyl sharýashylyǵyn damytýǵa, halyqqa qyzmet kórsetý júıesine qatysty aıtylǵan máselelerge oraı oı-pikirlerimen bólisti.
Qoǵamdyq damý, mádenıet, sport, din jáne jastar jónindegi komıssııa tóraǵasy Asııa Aqanova Joldaýdaǵy áleýmettik máselelerdi tarqata kelip, memlekettik tilde sapaly oqýlyqtar shyǵarý, jastarǵa qoljetimdi nesıe berýmen qatar stýdentterdi qoldaý, oqý oryndarymen tyǵyz baılanysty damytýǵa baılanysty pikirin bildirdi. Amanat partııasy fraksııasynyń jetekshisi Serik Esmatov «Joldaýda aıqyndalǵan mańyzdy baǵyttar «Halyq únine qulaq asatyn memlekette» júzege asatyn jarqyn jobalar» dep atap ótse, Densaýlyq saqtaý, bilim jáne jumyspen qamtý jónindegi komıssııa tóraǵasynyń orynbasary Araılym Shamova bilim salasyndaǵy ózekti máselelerge toqtaldy. «Búginde Almatynyń Alataý, Naýryz aýdandarynda mektep jetispeıdi. Sondyqtan taıaý keleshekte zamanaýı mektepterdiń boı kóteretindigi shaǵyn aýdandardaǵy mektep máselesiniń sheshilýine zor yqpalyn tıgizedi. Al áleýmettik qoldaýǵa muqtaj otbasylardyń balalaryna turaqty qoldaý kórsetip otyrý, bilim alýyna jaǵdaı jasap, densaýlyǵyna kóńil bólý urpaq bolashaǵyna alańdaýshylyqty bildiredi. Sondyqtan Joldaýda kóterilgen máseleler elimizdiń bolashaǵy úshin jaýapkershiligi joǵary», dedi A.Shamova.
ALMATY