Teatr álemindegi eleýli oqıǵanyń biri – «Astana Opera» teatrynyń H mereıtoılyq maýsymy 9 qyrkúıekte shymyldyq túredi. Osyǵan oraı álemdik sahnanyń prımadonnasy, «Gremmı» syılyǵynyń ıegeri Sýmı Cho qazaq sahnasynda óner kórsetedi. «Astana Operanyń» bas dırıjeri Alan Bóribaevtyń jetekshiligimen ótetin Gala-operanyń kórermenine usynar jańalyǵy kóp.
О́zara mádenıetaralyq almasý jylyna oraı Koreıa Respýblıkasynyń Qazaqstandaǵy elshiligine qarasty Koreı mádenı ortalyǵynyń qoldaýymen uıymdastyrylǵan keshte Sýmı Chomen birge qazaqstandyq juldyzdar – Azamat Jyltyrkózov, Medet Shotabaev, Tatıana Vısınskaıa, sondaı-aq ataqty maestro Alan Bóribaevtyń jetekshiligimen «Astana Opera» hory men orkestri óner kórsetedi. Ártister tanymal qazaq, koreı jáne batyseýropalyq shyǵarmalardy oryndaıdy. Mazmundy baǵdarlamaǵa A.Jubanov pen L.Hamıdıdiń «Abaı» operasynan kópshiliktiń súıip tyńdaıtyn «Toıbastar» sahnalyq kórinisi, J.Offenbahtyń «Gofman ertegileri» operasynan Olımpııa shýmaqtary, F.Legardyń «Kúlki eli» operettasynan hanzada Sý Hongtyń arııasy, «Pýrıtandyqtar» operasynan Rıkardonyń arııasy jáne taǵy basqa kóptegen týyndy engen.
Bul koreıalyq áıgili ánshiniń Qazaqstanǵa alǵashqy óner sapary emes. Buǵan deıin de elordaǵa eki ret kelgen óner ıesi astanalyq kórermenniń ystyq yqylasyn saǵyna eske aldy.
– Araǵa 10 jyl salyp Qazaqstan men Koreıa elderiniń myzǵymas dostyǵynyń arqasynda qazaqstandyq kórermendermen taǵy da kezdesetinimdi oılap ári qýanyp, ári tolqyp júrmin. Ásirese osy jobada Alan Bóribaev syndy álemdik mýzykanyń alybymen birge jumys isteıtinime óte qýanyshtymyn. Ol – keremet daryndy ǵana emes, adamgershiligi mol azamat. Eýropa men Amerıkada belgili orkestrlerge dırıjerlik etken daryndy dırıjerdiń talantyna tántimin jáne aıtýly konsertke arnalǵan baǵdarlama tujyrymdamasyn birge jasaý múmkindigine ıe bolǵanyma qatty qýandym, degen ánshi óner týrasyndaǵy kelisti áńgimesin odan ári jalǵady: – Eger kópshilik kórermen buqaralyq mádenıetten qýanysh tabatyn bolsa, al opera túrli dáýirler men olardyń tarıhı erekshelikterin beıneleıtin sıntetıkalyq ónerdiń erekshe janry bolyp sanalady. Osy bir erekshe ónerdiń ókili bolǵanyma baqyttymyn, deıdi juldyz.
Búgingi tańda Sýmı Cho álemdegi eń tanymal ánshilerdiń qatarynda. Ondaǵan jyldar boıy onyń esimi eń úzdik opera teatrlary men konsert zaldary afıshalarynyń kórkin ashyp keledi. Odan bólek, ánshiniń erek únin Roman Polanskıdiń «Toǵyzynshy qaqpa» fılminen de tyńdap, tamsanýǵa bolady. Sýmı Chonyń óner adamy retindegi ereksheligi sol – ol tyńdarmanyn tańǵajaıyp sándi kıimderimen ǵana emes, baı repertýarymen de tańǵaldyrǵandy jany súıedi. Sonymen qatar ánshi óz shyǵarmashylyǵynda tájirıbege jıi júginedi. Máselen, repertýaryn barokkodan crossover-ge deıin túrlendirgendi jaqsy kóredi. Ońtústik Koreıada Sýmı Chonyń daryny joǵary baǵalanady. Ánshi birneshe márte memlekettik nagradalarmen marapattalǵan jáne oǵan «Ulttyq ıgilik» qurmetti mártebesi berilgen.
Sóz sońynda ánshi kórermen qaýymǵa qoıylymdar, olardyń oqıǵalar jelisi týraly kóbirek aıtýǵa keńes berdi. Teatr isiniń damýy toqtap qalmaýy úshin qazirgi dáýirdiń tendensııalaryn kórsetetin opera shyǵarmalaryna nazar aýdarý qajet ekenin de alǵa tartty. Sondaı-aq opera dıvasy mýzyka jolyn sheksiz dep sanaıtynyn aıtyp, aldaǵy josparlary týraly da búkpesiz baıandap berdi:
– Búginge deıin men ártúrli álemdik týyndylary bar 50-den astam albom shyǵardym jáne osymen shektelip qalǵym kelmeıdi. Áli de óz shyǵarmashylyǵymnyń aýqymyn keńeıtip, mýzyka áleminiń jańa múmkindikterin baıqap kórsem deımin. Bolashaqta ózimdi jańa salalarda synap kórgim keledi. О́ner – shetsiz-sheksiz muhıt. Demek meniń de ónerim sol alyp muhıtqa quıylǵan tamshy ispettes. Sondyqtan da ónerdegi óz tájirıbem men eńbegimdi klassıkalyq mýzyka jolyn tańdaǵan ártisterdiń kelesi býynyna jetkizýge barymdy salamyn jáne IýNESKO-nyń «Beıbitshilik ártisi» ataǵynyń ıegeri retinde ártúrli mádenıetter men álemniń ózara qarym-qatynasyn alǵa jyljytý úshin tynbaı jumys isteımin. «Astana Opera» tórinde ótetin aldaǵy konsert sol maqsatymnyń bastaýy», dep ánshi sózin túıindedi.