Elimizdegi reformalar respýblıka jurtshylyǵynyń ómir sapasyna oń yqpalyn tıgizedi. «Halyqaralyq áleýmettaný jáne saıasat ınstıtýty» qoǵamdyq qory dırektorynyń orynbasary, Almaty qalalyq Qoǵamdyq keńesiniń múshesi Marat Shıbutov О́ńirlik kommýnıkasııalar qyzmetinde ótken brıfıngte Memleket basshysynyń «Ádiletti Memleket. Birtutas Ult. Berekeli Qoǵam» Joldaýyn talqylaý barysynda osyndaı pikir bildirip, júktelgen maqsat-mindetterdi iske asyrý tetikterine toqtaldy.
Prezıdent óz Joldaýynda bıyl kúzde kezekten tys prezıdenttik saılaý ótkizýdi usyndy. Osy oraıda Marat Shıbutov saılaýdy merziminen buryn ótkizý sebepterine toqtalyp, ótkizý kezeńderin túsindirdi. Saıasattanýshynyń aıtýynsha, saılaýdy kúzde ótkizý – Prezıdenttiń óz mandatyn naqtylaýdan, ıaǵnı azamattardyń seniminen týǵan usynys. Sonymen qatar bul usynys «Prezıdent laýazymynyń mańyzyn túbegeıli ózgertýmen qatar, sýperprezıdenttik respýblıkadan qarapaıym prezıdenttik-parlamenttik, bálkim parlamenttik respýblıkaǵa ótetin úlken kezeńniń bir bólshegi de bolýy múmkin», degen oıyn bildirdi.
Jıyn barysynda Qazaqstannyń uıǵyr jastary odaǵynyń tóraǵasy, Qazaqstan halqy Assambleıasynyń múshesi Rýstam Qaıryev «aldaǵy jyly elimizdi saıası, ekonomıkalyq, áleýmettik salalardaǵy qýatty qaıta jańǵyrýlar kútip tur», dep atap ótti. Onyń aıtýynsha, Memleket basshysy alǵa qoıǵan mindetterge el bolyp qoldaý kórsetý kerek. «Prezıdent Q.Toqaev aıtqandaı, «Ádiletti Qazaqstan qurý endi ǵana bastaldy». Ol osy jyldyń kúzinde Prezıdent saılaýyn kezekten tys ótkizýdi jáne Prezıdenttiń ókilettigin qaıta saılaný quqyǵynsyz 7 jyl merzimmen shekteýdi usyndy. О́z basym bul usynysty, sondaı-aq onyń ashyq básekelestik pen barlyǵyna teń múmkindikterge umtylýyn, Qazaqstanda jumys isteıtin Parlament pen máslıhattardy qalyptastyrýdyń jańa tetikterin qoldaımyn», deıdi R.Qaıryev. Osy oraıda ol Ulttyq qordyń jyldyq ınvestısııalyq kirisiniń 50 paıyzyn balalar 18 jasqa tolǵanǵa deıin arnaıy jınaq shottaryna ustaý týraly usynysqa erekshe toqtalyp: «Ulttyq qor – balalarǵa» baǵdarlamasy – bolashaq urpaqqa qamqorlyq. Kámelettik jasqa jetkende ata-analar bilim berý, baspanamen qamtý sııaqty kóptegen máselemen betpe-bet keledi. Sol kezde bul jınaqtyń úlken septigi tıedi», dep atap ótti. Sondaı-aq ol nashaqorlyqpen kúrestiń jalpyulttyq sıpat alýy qajettigin aıtyp, ásirese sıntetıkalyq esirtki máselesine nazar aýdaryp, eriktiler, joǵary synyp oqýshylary arasynda úgit-nasıhat, aqparattyq jumystardy kúsheıtý qajettigine toqtaldy.
Al «Adanaz» JShS dırektory, Almaty qalasy máslıhatynyń depýtaty Sana Jandaı ekonomıka, densaýlyq saqtaý, bilim berý, saıasat, eńbek naryǵyndaǵy ózgeristerge baılanysty pikir bildirip, áıelderdiń 61 jasta zeınetke shyǵýy jáne bala kútimine sáıkes jańashyldyqtyń kóptegen otbasy úshin úlken qoldaý ekenin atap ótti.
ALMATY