Prezıdent Qasym-Jomart Toqaev Qostanaı oblysyndaǵy jaǵdaı ońalǵan soń, Ahmet Baıtursynulynyń rýhyna taǵzym etip, qasıetti Torǵaıǵa atbasyn tireıtinin jetkizdi. Bul jaıly Memleket basshysy Áýlıekóldegi eriktilermen kezdesýde aıtty, dep habarlaıdy Egemen.kz Aqordanyń baspasóz qyzmetine silteme jasap.
Qasym-Jomart Toqaev Ahmet Baıtursynulynyń keıinge shegerilgen mereıtoıyna qatysty suraqqa jaýap berdi.
«Rasynda, bul – úlken sharýa. Zardap shekken azamattardyń bári úsh aıdyń ishinde baspanaly bolady dep ýádemdi berdim. Oǵan kúmánim joq. Ol – bir. Ekinshiden, Ahmet Baıtursynulynyń mereıtoıyna qatysty. Eń aldymen, osy máseleni shesheıik. Sodan keıin amandyq bolsa, osy bir qasıetti jerge kelip, Ahmet Baıtursynuly babamyzdyń rýhyna taǵzym etip, toıdy ótkizemiz», dedi Qasym-Jomart Kemeluly.