Mal qaıǵy emes qazir jan qaıǵy. Barsha otandastar qostanaılyqtardy qoldaıdy. Alǵashqylardyń biri bolyp Amanat partııasynyń ár óńirdegi ókilderi gýmanıtarlyq kómek uıymdastyrýdy qolǵa aldy. Eki kúnniń ózinde 807 tonna qajetti zattar jınalyp, apat bolǵan aımaqqa jóneltilýde.
Ortalyq kommýnıkasııalar qyzmeti alańynda ótken brıfıngte Amanat partııasynyń músheleri Qostanaı jurtshylyǵyn qoldaý maqsatynda atqarylyp jatqan jumystarǵa toqtaldy. Partııa hatshysy Dáýlet Káribek el basyna kún týǵanda birligimizdi tanytýdyń mańyzy zor ekenin aıtty.
– Qostanaıdaǵy jaǵdaıǵa barsha otandastar alańdap otyr. Elimizdiń túkpir-túkpirinen habarlasyp, qol ushyn sozýǵa nıet bildirgender kóp. Áýlıekól aýdanyna qarasty Áýlıekól aýylyndaǵy «Bolashaq» stadıonynda ornalasqan gýmanıtarlyq kómekti qabyldaý pýnktine Amanat-tyń alǵashqy gýmanıtarlyq kómegi jetti. Azyq-túlik ónimderi, dári-dármek, jeke gıgıenalyq zattarmen qatar, qurylys materıaldary da bar. Partııa hatshysy Rınat Kertaev bastaǵan depýtattar apat bolǵan aımaqqa arnaıy baryp, turǵyndarmen kezdesip, problemalardy sheshýge kirisip ketti. «Jastar Rýhy» jastar qanatynyń ár aımaqtaǵy múshelerinen quralǵan 1000-nan astam volonter gýmanıtarlyq kómekti uıymdastyrýǵa jumyldyryldy. Onyń ishinde 300 jas zardap shekkenderge kómek kórsetý jáne qalpyna keltirý jumystaryna qatysý úshin Qostanaı oblysynda júr. Partııa ókilderi ár turǵyn óz úıine kirip, qalypty ómirge oralǵansha tıisti kómek kórsetýdi jalǵastyratyn bolady, – dedi Dáýlet Káribek.
Partııa hatshysy Rınat Kertaev otandastardyń qoldaýyn kózben kórip, sezinip, patrıot azamattardyń kóp ekenine qýanǵanyn jetkizdi. «Syn saǵatta qostanaılyqtarǵa kómektesý – paryzymyz. Partııa Tóraǵasy Erlan Qoshanovtyń bastamasymen barlyq óńirlik fılıaldarda pýnktter ashtyq. Barlyq partııalyqtar qoldaý kórsetti. Áýlıekól aýylyndaǵy «Bolashaq» stadıonynda ornalasqan gýmanıtarlyq kómekti qabyldaý pýnkti eki kúnniń ishinde toldy. Qostanaı jurty qoldaý kórsetip jatqan otandastaryna alǵysyn bildirýde. Biz óz tarapymyzdan zardap shekken otbasylardyń mektep tabaldyryǵyn attaǵan 34 oqýshysyna qajetti oqý quraldaryn, kıim-keshekterdi syılamaqpyz. О́zge de kómekter úzdiksiz kórsetiledi», dedi ol.
Parlament Májilisiniń depýtaty, Amanat partııasy fraksııasynyń múshesi Amanjol Áltaev jergilikti turǵyndar da bir jaǵadan bas, bir jeńnen qol shyǵaryp, tatýlyqtaryn tanytyp jatqanyn aıtty. Máselen, Temir Hamıtuly degen azamat órtengen kóliktegi aýyldasyn qutqaramyn dep denesiniń 9 paıyzyn kúıik shalǵan. «Tilsiz jaýdy aýyzdyqtaýda kásibı sheberlikterin kórsetken tótenshe jaǵdaılar qyzmetiniń mamandaryna, sarbazdarǵa alǵysymyzdy bildiremiz», dedi A.Áltaev.
Partııanyń Qostanaı oblystyq fılıalynyń atqarýshy hatshysy Bıbigúl Aqqojına búginde 21 gýmanıtarlyq kómekti qabyldaý beketi jumys istep turǵanyn aıtty. Táýlik boıy qabyldaıtyn pýnkt te bar. Ol óz kezeginde barsha qostanaılyqtardyń atynan qıyn kezeńde qoldaý kórsetip jatqan qazaqstandyqtarǵa rızashylyǵyn bildirdi.
Amanat partııasy Ortalyq apparatynyń ujymy Qostanaı oblysyndaǵy tabıǵı órtterden zardap shekken turǵyndarǵa kómek kórsetý qoryna bir kúndik jalaqysyn aýdaratynyn jetkizdi.