Shyǵys Qazaqstanda birneshe kúnnen beri órt qaýiptiligi joǵary. О́rt sóndirýshiler bir táýliktiń ózinde ǵana dala órtin sóndirýge 10-15 ret shyǵady. Búgin Marqakól óńirinde órt shyqty, dep habarlaıdy Egemen.kz.
Kúrshim aýdanyna qarasty «Marqakól orman sharýashylyǵy» RMM, Bobrovka ormanshylyǵy jáne Tósqaıyń aýyldyq okrýgi aýmaǵynan órt shyqqan. Aldyn ala boljam boıynsha jalyn sharpyǵan aýmaq 300 gektardaı. Ázirshe tilsiz jaý jaqyn mańdaǵy aýyldarǵa qaýip tóndirip turǵan joq. Aıta ketsek, kók tútinge oranǵan aýmaqqa eń jaqyn eldi meken – Tósqaıyń aýyly.
О́rtke qarsy kúreske oblystyq TJD órt sóndirýshilerinen, ormanshylardan jáne jergilikti atqarýshy organdardan 114 adam men 17 tehnıka jumyldyryldy. Taýly jer bolǵandyqtan, tilsiz jaýdyń betin qaıtarý ońaıǵa soqpaı tur. Onyń ústine kúnniń ystyǵy da kedergi.
Sondaı-aq órtti sóndirý úshin MI-2 tikushaǵy men Eýrokopter de kókke kóterildi. О́skemen qalasynan kómekke jeke quramnan 46 adam jáne 6 birlik tehnıka jóneltildi.
Tabıǵattyń qýrap turǵan dál qazirgi sátinde ormandy, taýly jerde asa abaı bolǵan jón.
Shyǵys Qazaqstan oblysy