Bıyl Qyzyljar qalasyndaǵy №9 orta mektepke Ahmet Baıtursynulynyń esimi berilgen bolatyn. Ult ustazynyń esimin alǵan oqý orny onyń 150 jyldyq mereıtoıyna óziniń tusaýkeserin ótkizdi.
1988 jyly ashylǵan bul mektepte qazir 1365 oqýshy bilim alady. О́ndiristik oryndary, mekeme-uıymdary joq, tek turǵyndar mekeni bolyp tabylatyn osy 20-shy móltek aýdandaǵy jalǵyz mektep te osy. Qazaq balalary az bolmasa da mektep oryssha bilim beredi. Ata-analardyń qalaýy solaı bolǵan soń amal joq. Bir kezde munda qazaq synyptary ashylǵan, biraq ondaǵy oqýshylar keıin ashylǵan qazaq mektepterine aýysyp ketken.
Mektep dırektory Sáýle Bolatbekova Ult ustazynyń atyn alýyna baılanysty tusaýkeserge ujymnyń muqııat daıyndalǵanyn aıtty. Kelgen qonaqtar arasynda Petropavl qalasynyń ustazdar qaýymy ókilderi, ardagerler, «Qazaq tili» qoǵamynyń belsendileri, bilim salasynyń qyzmetkerleri men ata-analar boldy. Olar ekige bólinip, aldymen Ahmet Baıtursynulyna arnalǵan synyp saǵattaryna qatysty. Baıyrǵy ustaz Saltanat Omarova ótkizgen synyp saǵatynda balalardyń qazaq tilin úırenýge qulyqty ekenin, olar qazaqsha berilgen túrli tapsyrmalardy oryndaýǵa qushtarlyǵyn kórdik.
Eń úlken shara mekteptiń akt zalynda bolyp, munda muǵalimder men oqýshylar kelgen qonaqtarǵa ózderiniń ónerlerin kórsetip baqty.
PETROPAVL