Ulttyq mýzeıde TAMYR shyǵarmashylyq tobynyń «Arba» kórmesi ashyldy. Is-sharaǵa mádenıet jáne qoǵam qaıratkerleri, tanymal sýretshiler, sondaı-aq zııaly qaýym ókilderi qatysty.
TAMYR shyǵarmashylyq tobyn Shymkent qalasy men Túrkistan oblysynyń sýretshileri qurdy. Keıin birlestik quramyna Reseı men Qyrǵyzstan sýretshileri qosylyp, halyqaralyq mártebege ıe boldy.
Aıta keteıik, bul – sýretshilerdiń Ulttyq mýzeıdegi ekinshi kórmesi. Bıyl qylqalam sheberleri tyń týyndylaryn usynýmen qatar mýzeımen birlesip, beıneleý óneriniń qazirgi jaǵdaıyn talqylap, dóńgelek ústel uıymdastyrdy.
Sýretshi Sultan Ilıaev shyǵarmashylyq birlestikterdiń ónerdiń damýyna qosatyn úlesi týraly sóz qozǵady.
«Elimizde shyǵarmashylyq birlestikter týraly zań qabyldanyp, olar resmı statýsqa ıe bolsa, barlyq sýretshiler «jalǵyzdyń úni shyqpas» demekshi, birlestik aıasynda qyzmet etip, kórme uıymdastyrý, konkýrstyq irikteýden ótý syndy kóptegen máseleni sheshýde uıym tarapynan qoldaý tabar edi», dedi ol.
Máselen, keıbir sýretshiler kúnkóris qamy úshin táýir týyndylaryn az aqshaǵa satýǵa májbúr. Sonymen qatar «áı deıtin áje, qoı deıtin qoja joq» zamanda sapasy tómen jumystardy kórkemsýret óneriniń shyńy dep usynatyndar da joq emes.
Kezinde músinshi Erkin Mergenov KSRO Sýretshiler odaǵynyń jumysyn úlgi etip, qylqalam sheberlerin biriktirip, qoldaý kórsetý kerektigin aıtqan edi. Sol kezdegi júıeli qoldaýdyń nátıjesinde belgili elý qazaq sýretshisi dúnıege kelgen edi.
TAMYR tobynyń músheleri Ulttyq mýzeıge kórme uıymdastyrýǵa qoldaý kórsetkeni úshin alǵystaryn aıtyp, eki tarap yntymaqtastyq pen seriktestikti bekitý men nyǵaıtý maqsatynda memorandýmǵa qol qoıý kerektigin aıtty.