Ulttyq banktiń Aqsha-nesıe saıasaty komıteti bazalyq paıyzdyq mólsherlemeni 14,5 paıyz deńgeıinde saqtaý týraly sheshim qabyldady. Sheshim qalyptasqan ekonomıkalyq jaǵdaıdy, táýekelder teńgerimin, sondaı-aq Ulttyq banktiń jańartylǵan boljamdaryn eskere otyryp qabyldanǵan.
Ulttyq banktiń habarlaýynsha, logıstıkalyq qyzmet qunynyń ósýine, saýda-seriktes elderdegi joǵary ınflıasııaǵa jáne rýblge qatysty teńge kýrsynyń álsireýine baılanysty týyndaǵan syrtqy qysym áli saqtalyp otyr. Bul rette Ulttyq bank 2022 jyldyń basynan bastap bazalyq mólsherlemeniń aıtarlyqtaı artýynyń ekonomıkaǵa áseri áli de bolsa sońyna deıin baıqalmady dep málimdedi. Tamyzda ınflıasııa 16,1 paıyzǵa deıin jedeldedi. Azyq-túlik taýarlary – 20,8 paıyzǵa, azyq-túlikke jatpaıtyn taýarlar – 15,5 paıyzǵa, aqyly qyzmetter 10,1 paıyzǵa ósken.
Halyqaralyq valıýta qorynyń boljamy boıynsha, álemdik ekonomıka 2021 jylǵy 6,1 paıyzdan 2022 jyly 3,2 paıyzǵa deıin jáne 2023 jyly 2,9 paıyzǵa deıin baıaýlaıdy. Qazaqstannyń negizgi saýda áriptesi sanalatyn elder (EO, Qytaı, Reseı) boıynsha 2022-2023 jyldarǵa arnalǵan boljamdar da nasharlady.
«Álemde tutynýshylyq ınflıasııa joǵary deńgeıde qalyp otyr. EO-da 2022 jylǵy shildede jyldyq ınflıasııa 9,8 paıyzǵa deıin jedeldedi. AQSh-ta munaı baǵasynyń birshama tómendeýi saldarynan ınflıasııa 8,5 paıyzǵa deıin baıaýlady. Halyqaralyq valıýta qorynyń 2022-2023 jyldarǵa arnalǵan jahandyq ınflıasııa boıynsha boljamdary baǵanyń buryn kútilgennen de tezirek ósýin kózdeıdi. Álemdik munaı naryǵynda munaı baǵasynyń joǵary deńgeıi saqtalady dep kútilýde. Halyqaralyq uıymdardyń boljamy boıynsha, jaqyn arada benzın men ózge de energııa kózderine baǵanyń joǵary bolýyna baılanysty suranys azdap tómendeýi yqtımal. Munaı óndirý birtindep artady, biraq bul áser Reseı men Taıaý Shyǵys elderindegi álsiz munaı óndirýmen teńestiriledi. Boljam boıynsha, 2022 jyly Brent markaly munaı baǵasy ortasha eseppen 1 barrel úshin – 105,3 dollardy, al 2023 jyly 1 barrel úshin 90,3 dollardy quraıdy. Osy faktorlar men boljamdardy eskere otyryp, bazalyq ssenarıı aıasynda Brent markaly munaı baǵasyn 2023 jyly aǵymdaǵy deńgeıden barreline 90 dollar jáne 2024 jyly barreline 85 dollar ortasha belgisine deıin birtindep tómendetý traektorııasy belgilendi», dep málimdedi Ulttyq bank.
Qazirgi alǵysharttardy eskere otyryp, 2022 jyldyń sońyna taman ınflıasııa 16-18 paıyz aralyǵynda boljanady. Bul – Ulttyq banktiń aldyńǵy baǵalarynan joǵary. 2023 jyly ınflıasııa birtindep 7,5-9,5 paıyzǵa deıin baıaýlamaq.
«Birinshiden, aǵymdaǵy aqsha-nesıe saıasatyn qoldaý faktorlarynyń biri Ulttyq banktiń nesıelik ımpýlsti basý týraly málimdemesine qaramastan, ekonomıkany nesıelendirýdiń odan ári ósýi boldy. Bıyl shildede ekonomıkaǵa berilgen kredıt jyldyq mánde 27,1 paıyzǵa, 20,4 trln teńgege deıin ósti. Ulttyq bank 1 tamyzdan bastap ekonomıkany nesıeleý boıynsha keńeıtilgen statıstıkany bere bastady. Osylaısha, basqa da qarjylyq uıymdardy qosa eseptegende ekonomıkany nesıeleýdiń jalpy somasy 24,2 trln teńgege jetti. Ekinshiden, bul sheshimniń mańyzdy draıveri retinde Ulttyq banktiń teńgeleı depozıtterdi qorǵaý nıetin aıtar edik. Bul sharalar teńgeleı depozıtti arttyryp, dollarlyq salymdardy azaıtty. Maýsymnan beri teńgeleı depozıttiń ósimi baıqalady, ol qazir 28,1 trln teńgege jetti», dedi Ulttyq bank tóraǵasy Ǵalymjan Pirmatov bazalyq stavka jaıly sheshimge qatysty pikir bildire otyryp.
Onyń sózine qaraǵanda, aǵymdaǵy baǵamdy saqtaý jáne qatań aqsha-nesıe saıasatyn jalǵastyrý valıýta naryǵyndaǵy tepe-teńdikti saqtaýǵa yqpal etedi.
Ulttyq banktiń Aqsha-kredıt saıasaty komıtetiniń bazalyq mólsherleme jónindegi kezekti josparly sheshimi 2022 jylǵy 24 qazanda Nur-Sultan ýaqytymen 14:00-de jarııalanady.