PTC Holding Qostanaı oblysyndaǵy alapat órtten zardap shekkenderge 50 mln teńge qarjylaı kómek kórsetti.
Jaqynda top aksıonerleri jedel kómek kórsetý týraly sheshim qabyldap, qarjyny órtten zardap shekkenderge qarajat jınaqtaý úshin arnaıy qurylǵan «Qaıyrymdylyq KZ» qoǵamdyq qorynyń shotyna aýdardy.
«Biz tilsiz jaýdyń kesirinen baspanasyz qalǵan halyqtyń jańa úılerine tezirek oralǵanyn qalaımyz. Qaıyrymdylyqtan bizdiń kompanııa shet qala almady. Sondyqtan aqshalaı kómek kórsetý týraly sheshim qabyldandy», degen kompanııanyń basqarma tóraǵasy Tımýr Qarabaev birlesken kúsh-jigerdiń arqasynda Qostanaı oblysyndaǵy jaǵdaıdy qysqa merzimde qalypqa keltirýge bolatynyna senim bildirdi.
* * *
«Qazposhta» AQ Amanat partııasynyń astanalyq fılıalynan, ıaǵnı, Nur-Sultannan Qostanaıǵa, jergilikti fılıaly Qostanaıdan Áýlıekól aýdanyna gýmanıtarlyq kómek jetkizýdi qolǵa aldy. Júkti tasymaldaý qyzmeti «Qazposhtanyń» óz qarajatyna júzege asyrylady.
«Qostanaı oblysy turǵyndarynyń basyna túsken aýyrtpalyq eshkimdi de beıjaı qaldyrmady. Sonyń ishinde «Qazposhta» da bar. Biz de kóp oılanbastan kómekke qosyldyq. Aımaqqa qansha kómek qajet bolsa, sonsha gýmanıtarlyq júkti jetkizemiz», dedi AQ basqarma tóraǵasy Serik Saýdabaev.
«Qazposhta» AQ Qostanaı oblystyq fılıalynyń dırektory Jánibek Taltekovtiń aıtýynsha, magıstraldy júk kóligi arqyly elordadan Qostanaıǵa jetkiziletin shamamen 6 tonna júk evakýasııalanǵan aýyl turǵyndaryna beriledi.
Sonymen qatar órtten zardap shekkenderge kómek kórsetý bastamasyna «Qazposhta» AQ qyzmetkerleri azyq-túlik pen eń qajetti zattardy gýmanıtarlyq kómek pýnktine jetkizip, biryńǵaı qor shotyna aqsha aýdarmaq.