3-5 qyrkúıek kúnderi Fransııanyń astanasy – Parıj qalasynda para taekvondodan álemdik Gran-prı serııasy aıasynda jekpe-jekter ótti. Bul Parıj-2024 Paralımpııa oıyndarynyń aldyndaǵy iri reıtıngtik jarystardyń biri boldy. Atalǵan sporttyq is-sharaǵa 25 elden úzdik degen 85 taekvondoshy qatysty.
Baıraqty básekelerde Qazaqstan tarapynan tórt sportshy baq synap, olar úsh júldege qol jetkizdi. Muny aıtarlyqtaı jaqsy nátıje deýimiz kerek. Máselen, Nurlan Dombaev 80 kılo salmaqta jekpe-jekke shyǵyp, K-44 dárejesinde kúmis medal jeńip alsa, О́miráli Nyshan da osy salmaq pen dárejede kúresip, qola júldege qol jetkizdi. Sondaı-aq 57 kıloda (K-44) bozkilemge túsken Kámıla Dosmalova da qola medaldy moınynda jarqyratty.
«Fransııada Gran-prı serııalarynyń ekinshi jarysy tabysty ótti. Alǵashqy jekpe-jekter Bolgarııada uıymdastyrylǵan bolatyn. Al úshinshisi aldaǵy qazan aıynda Anglııanyń Manchester qalasynda shymyldyq túredi. Naqtylaı tússem, bul G6-reıtıngtik jarysy bolyp tabylady jáne oǵan álemniń tek úzdik sportshylary qatysady. Osyndaı deńgeıdegi jekpe-jekterde júlde alý – úlken jetistik», deıdi Dene múmkindigi shekteýli adamdarǵa arnalǵan sporttyq daıarlaý ortalyǵynyń komanda basshysy Mereı Bıǵarın.
«Dene múmkindigi shekteýli adamdarǵa arnalǵan sporttyq daıarlaý ortalyǵy» RMQK Mádenıet jáne sport mınıstrligi Sport jáne dene shynyqtyrý isteri komıtetiniń vedomstvolyq baǵynysty uıymy bolyp tabylady. Ortalyqtyń basty qyzmeti Sýrdlımpıadalyq, Paralımpıadalyq jáne Paralımpıadalyq emes sport túrlerin damytýǵa baǵyttalǵan.