Jazıraly Jańaarqa jerinde taǵy bir meshit boı kóterdi. Kentke kireberiste oryn tepken jańa meshit jolaýshylar úshin óte yńǵaıly. Saparda júrseńiz, toqtap, qulshylyǵyńyzdy jasap alasyz. Týra joldyń boıynda.
Jańa meshitti jańaarqalyq Ábdishevter áýleti salyp otyr. Jaratqannyń madaǵyn alýdy maqsat sanaǵan olar ıman ordasyna babalary Naımantaı men Baıǵozy batyrlar esimin bergendi jón sanaǵan. El-jurty úshin atqa qonǵan ákeli-balaly qos batyrdy ulyqtaý maqsatynda. Meshittiń ashylý saltanatyna Qazaqstan musylmandary dinı basqarmasynyń naıb múftıi Ershat Ońǵar, din salasynyń zııaly ókilderi jáne aýdan basshylyǵy qatysty.
– Ákeli-balaly qos batyrdyń esimin ulyqtaý maqsatynda jańa meshitke «Baıǵozy-Naımantaı batyrlar» ataýy berilip otyr. Qazaqstan musylmandary dinı basqarmasy sońǵy birer jylda qazaqtyń arǵy-bergi tarıhynda aty qalǵan, táýelsizdik jolynda kúresken azamattardyń esimin meshitke berip keledi. Qazirgi tańda elimiz boıynsha 2700-den asa meshit bar. Búgin, mine, qos batyrdyń atyn jańǵyrtý maqsatynda jańa qulshylyq ordasyna sol kisilerdiń aty berildi. Allanyń jerdegi úıin salǵan adamdarǵa qatysty Paıǵambarymyz (s.ǵ.s.) óz hadısinde bylaı deıdi: «Kim jer betinde Allanyń jerdegi úıin salýǵa atsalyssa, Alla Taǵala ol kisige jumaqtan oryn daıyndaıdy». Islam tarıhynda meshit salý – qadirli is bolǵan, – dedi óziniń quttyqtaý sózinde naıb múftı.
Saltanatty ashylý rásiminen keıin jańa meshitke jıylǵan jamaǵat arasynda ulttyq oıyn kórinis tapty. As berilip, Quran oqylyp, jamaǵat bir sapqa turyp namaz oqydy. Kópshilik izgilikpen iz qaldyryp júretin Ábdishevter áýletine rızashylyqtaryn jetkizdi.
Qasymhan ǴALYM,
jýrnalıst
Ulytaý oblysy,
Jańaarqa aýdany