Qazaqstandyq qoǵamdyq damý ınstıtýtynyń alańynda Sarap klýbynyń «Joldaý-2022: eksperttik pikir» atty otyrysy ótti. «Qazaqstandyq qoǵamdyq damý ınstıtýty» KeAQ-tyń uıytqy bolýymen ótken otyrysqa qoǵamdyq birlestikterdiń basshylary, saıasattanýshylar, QQDI sarapshylary qatysyp, elimizde qordalanǵan máselelerdi sheshý joldaryn talqylady.
Otyrysta talqylanǵan negizgi taqyryp – Prezıdent Q.Toqaevtyń Qazaqstan halqyna Joldaýynda usynǵan, elimizde qordalanǵan máselelerdi sheshý joldary, halyqtyń ál-aýqatyn odan ári arttyrýǵa baǵyttalǵan, memleketti odan ári jańǵyrtý jónindegi áleýmettik qoldaý sharalaryna qatysty jańa mindetter.
Is-shara ınstıtýttyń Baǵdarlama jobalary basqarmasynyń analıtık-menedjeri Oljas Beısenbaev pen Strategııalyq taldaý tobynyń jetekshisi Lázat Nurqatovanyń moderatorlyǵymen ótti.
«Qazirgideı kúrdeli geosaıası jaǵdaıda memlekettiń ishki saıası reformalarynyń ornyqtylyǵy óte mańyzdy másele. Prezıdent Joldaýyndaǵy jańa saıası praktıka, jańa saıası dástúr – «jarııalylyq» prınsıpine úlken kóńil bólip otyr. Zertteýshilerdiń jaz aılarynda júrgizgen zertteýlerine súıensek, qazir qoǵamda áleýmettik-ekonomıkalyq máseleler basym. Joldaýda da Memleket basshysynyń osy baǵyttarǵa erekshe nazar aýdarǵanyn kórip otyrmyz», degen Oljas Beısenbaev otyrystan utymdy pikirler men mańyzdy usynystar kútetindigin aıtty.
Jıynda sóz alǵan Eýropalyq quqyq jáne adam quqyqtary ınstıtýtynyń dırektory Marat Bashımov memlekettik apparattyń jumysyna toqtalyp, Joldaýdyń Ádiletti Qazaqstan qurýǵa negizdelgenin alǵa tartty. «Eń birinshi, jer máselesin qarastyrý kerek. Memleket baılyǵynyń ıesi halyq bolǵandyqtan, sol jerden shyǵatyn munaı men gazdyń paıdasyn halyq kórmeı otyrǵany ádiletsizdik. Ekinshi úlken másele – quqyq salasy. Osy saladaǵy túrli ádiletsizdikterdiń saldarynan jemqorlyq kóp, al quqyq salasynda ádilettilik ornamaı eldiń damýy da jaqsarmaıdy», dedi sarapshy.
Al saıasattanýshy Ádil Saılaýbek «Jaıly mektep» ulttyq jobasynyń bilim salasynda qyzmet isteıtinder úshin qýanyshty jańalyq bolǵanyn aıtty. «Ár oqýshynyń jaıly jaǵdaıda bilim alýy biz úshin mańyzdy. Endigi kezekte osy jobany, jalpy bilim salasyna qatysty ózgeristerdiń barlyǵyn iske asyrý siz ben bizdiń qolymyzda», dep memlekettiń uzaqmerzimdi damýyndaǵy eń perspektıvaly baǵyty – bilim salasy týraly sóz qozǵady Á.Saılaýbek.
Prezıdent janyndaǵy Qazaqstan strategııalyq zertteýler ınstıtýtynyń jetekshi ǵylymı qyzmetkeri Muhıt Asanbaev Joldaýda aıtylǵan baǵyttardyń durystyǵyna toqtalyp, qoǵamdaǵy pikirtalastyń bolýy saıası mádenıettiń qalyptasqanyn kórsetetindigin aıtsa, Lázat Nurqatova árbir azamat memleket damýyndaǵy óz jaýapkershiligin sezinip, sol jaýapkershilikke saı áreket etse el damýynda oń ózgerister bolatyndyǵyna senim bildirdi.
Amanat partııasy qoǵamdyq saıasat ınstıtýtynyń bas sarapshysy Erlan Ahmedı «Kúshti Prezıdent – yqpaldy Parlament – esep beretin Úkimet» formýlasyn tolyqqandy iske asyrýdyń mańyzdylyǵyna toqtaldy.
«Memlekettik qyzmet júıesi – qansha reformalasaq ta bir júıege kelmeı jatqan kúrdeli bıýrokratııalyq apparat. Ekonomıkany reformalaý úshin bizge kásibı memlekettik qyzmet júıesi kerek. Memlekettik basqarý salasyna da básekelestik qajet», dedi «Qazaqstandyq qoǵamdyq damý ınstıtýty» KeAQ sarapshysy Eldos Jumaǵulov.