Táýelsiz Qazaqstan qalamgerleriniń ár jańa týyndysy qalyń oqyrman qaýym úshin qashanda olja. Jýyrda Almatydaǵy «Toǵanaı-T» baspasynan «Kókirek-kózben kórgenderim» atty kitap jaryq kórdi. Negizinen esse, maqala, oı-tolǵanystardan turatyn kitaptyń avtory qostanaılyq belgili aqyn, fılologııa ǵylymdarynyń kandıdaty Naǵashybaı Muqatov.
Zer sala, zeıin qoıa paıymdasaq tylsym tirshilik tutasymen san alýan taqyryp qoı. Asqaq adamgershilik, kisilik kelbet, aqıqat pen shyndyq, týǵan til tamyry tereńge jaıylatyn taǵylymdy tárbıesi avtordy jıi mazalaıdy eken. Ásirese «Nege», «Qol shapalaqtaý», «Qaladaǵy qarttar oıyny», «Men qazaq qyzdaryna qaıran qalam», «Til arqyly tiri júreıik» dep atalatyn oı-tolǵamdar kitap mazmunyn baıyta túsken.
Uly ustaz Ybyraı Altynsarınnen bastap aǵartýshy aqyn, jazýshy retinde rýhanı keńistikte keremet iz qaldyrǵan qarymdy qalamgerler haqyndaǵy zertteý eńbekter maǵynaly mazmuny, dáıekti derekterimen syr shertedi. Jáne bir aǵynan aqtaryla aıtar qýanyshty jaı, osy ómirdiń óz kórinisinen týyndaǵan shynaıy shyǵarmalardyń keıbiri kezinde «Egemen Qazaqstan» gazeti betine jarııalanyp, oıly oqyrman tarapynan laıyqty baǵasyn ıelenip te úlgergen.
Qolymyzdaǵy kitaptyń kótergen óz júgi bar. Erinbeı oqydyq, tamsanyp, tushyndyq. Sondyqtan da biz bul kitapty pýblısıst retinde de jazý ónerinde óz ornyn ornyqtyryp úlgergen qalamger Naǵashybaı Muqatovtyń tolymdy tabysy der edik.
Qaısar ÁLIM,
«Egemen Qazaqstan».