Elordada mamyrdyń 10-y kúni bastalǵan II Halyqaralyq «Astana Piano Passion» klassıkalyq mýzyka festıvali alǵashqy sátten-aq mazmundylyǵymen, qyzyqty sátterimen erekshelenýde.
Mamyrajaı mamyrda elordanyń mádenı ómirinde eleýli oqıǵalar oryn alyp jatyr desek, sonyń ishinde aıryqsha toqtalyp ótetin jaıt – «Astana Piano Passion» festıvaliniń jaryǵy basqa sharalarǵa qaraǵanda áldeqaıda aýqymdy, áldeqaıda mazmundy deýge tolyq negiz bar. Ekinshi Halyqaralyq klassıkalyq mýzyka festıvali men jas pıanınoshylar baıqaýy aıasynda san túrli is-sharalar júzege asýda. Máselen, «Astana-Opera» teatrynyń kameralyq zalyndaǵy «Astana Piano Passion» birinshi halyqaralyq jas pıanınoshylar baıqaýy jeńimpazdarynyń, Máskeý fılarmonııasynyń jeke oryndaýshysy, halyqaralyq baıqaýlardyń laýreaty, Reseı Prezıdenti syılyǵynyń ıegeri Ekaterına Mechetınanyń, sondaı-aq, «Qazaqstan» OKZ-daǵy Reseıdiń halyq ártisi Denıs Masýevtiń konsertteri elorda jurtshylyǵy úshin merekelik syı ispetti. Bárin aıt ta, birin aıt, bul sharalardyń ótýine uıytqy bolǵan negizgi óner saıysy klassıkalyq mýzykanyń bolashaq jaryq juldyzdaryna dańǵyl jol ashýda. Taǵy bir este qalatyn jaǵdaı, Qazaqstannyń jas mýzykanttary men oqytýshy-ustazdary úshin kásibı úzdik mamandardyń sheberlik-synyptaryn uıymdastyrý qolǵa alynyp otyr. Atap aıtatyn bolsaq, Mıshel Berofftyń (Fransııa), Hıýng-Djýn Changtyń (Ońtústik Koreıa) sheberlik synyptary, ásirese, jas mýzykanttar úshin bıik kókjıekter múmkindigi desek, artyq aıtpaıtyn sııaqtymyz.
Halyqaralyq doda barysyndaǵy qazaqstandyq muǵalimder men qazylar alqasynyń dóńgelek ústeli búkpesiz oılardyń ashyq alańy bolady degen senim taǵy bar. Qazirdiń ózinde QazUО́Ý-niń Organ zaly dúnıe júziniń túkpir-túkpirinen kelgen jas pıanınoshylardyń súıikti ornyna aınalyp úlgerdi. Saıysta «Astana Piano Passion» baıqaýyna qatysýshylar álemdik klassıkalyq shyǵarmalarǵa qosa qazaqstandyq kompozıtorlardyń da shyǵarmalaryn oryndaýlary tıis.
Festıvaldi Astana qalasy ákimdigi men «Accordi di Astana» qoǵamdyq qory uıymdastyryp otyr. Iri mýzykalyq baıqaýdyń Ortalyq Azııada ótýi talantty balalarǵa udaıy qamqorlyq kórsetip otyrýǵa múmkindik týǵyzady jáne Qazaqstandaǵy fortepıanolyq mekteptiń dástúrli úlgisin nyǵaıtady dep qabyldanýda. Sonymen qatar, oryndaýshylyq ádistemeler arqyly ózara tájirıbe almasý, elaralyq shyǵarmashylyq baılanysty nyǵaıtý keleshekte otandyq mýzykalyq bilim berýdiń kásibı deńgeıin kóterýge oń yqpalyn tıgizbek.
Jaqynda «Astana Piano Passion» jas pıanınoshylar baıqaýynyń jartylaı fınalynyń nátıjeleri málim boldy. Baıqaý fınalyna Qazaqstannan 3 birdeı jerlesimizdiń ótýi óte qýanyshty jaǵdaı. Jas pıanınoshylardan kishi top boıynsha kelesi aınalymǵa Aıdıba Talamýnýer (Qazaqstan), Anısa Dajaeva (Reseı), Bolat Mahambet (Qazaqstan), Okýı Shıo (Japonııa), Sanjaráli Kópbaev (Qazaqstan), Aleksandra Stychkına (Reseı) ótse, orta toptan Davıt Hrıkýlı (Grýzııa), Chen Ksýehong (Qytaı), Vladıslav Handogıı (Belarýs), Gleb-Iosıf Romanchýkevıch (Reseı), Nıkıta Býrzanısa (Ýkraına), Anastasııa Mahamendrıkova (Reseı) aldyńǵy shepke taban tiredi. Saıys erejesine sáıkes, aqtyq báıgege qatysýshylardyń teń jartysynyń ǵana qamtylýy baıqaýdyń álemdik deńgeıin aıqyndaıtyn taǵy bir qyry deý lazym.
Bir sózben aıtqanda, «Astana Piano Passion» II Halyqaralyq jas pıanınoshylar tyńdalymy keremet áser qaldyrýda. Aıdıba Talamýnýerdiń oryndaýyndaǵy Ǵ.Jubanovanyń kúıi kórermendi tánti etti. Shyǵarmanyń ón boıynan dombyra úniniń kúmbir qaǵyp turýy naǵyz talant ıesiniń ǵana sheberliginen týatyn óner syıy dep qabyldaý kerek. Aıdıba óz óneri arqyly lırıkalyq saryn men mýltfılm kórinisin beıneli jetkize aldy. Ásirese, Koplendtiń «Mysyq pen tyshqan» shyǵarmasy este qaldy. Anısa Dajaevanyń oryndaýyndaǵy Chaıkovskıı shyǵarmasynyń názik úni men stereofonııalyq polıfonııa sezimi tamasha áser qaldyrdy. Anastasııa Klıýcherova Zavgorodnyıdyń pesasynan shynydaı erekshe taza dybys taba bildi.
Álııa Jaqparovanyń oryndaýyndaǵy Bethovenniń shyǵarmasy kóńilge shýaq ornatty. Jas sheber zaldaǵy jurtty ónerimen tez baýrap aldy. Bolat Mahambettiń ónerinde Grıg shyǵarmalarynyń názik sazdy úni este qalsa, Bogdan Voloshın dybystyq náziktigimen ǵana emes, shyǵarmanyń keı jerlerinde sýyryp salmalyq sheberligimen de tyńdaýshy júregine jol taba bildi. Japonııalyq pıanınoshy qyz Shıo Okýıdiń óte názik te syrshyl máneri, ártistigi kópshilik janaryna jas tundyrǵan. Al Glınka-Balakırevtiń «Boztorǵaı» shyǵarmasyn júrekpen sezinip oınaý kez kelgen mýzykanttyń qolynan kele bermeıtin sheberlik ekeni ras. Bul rette Sanjaráli Kópbaevtyń oryndaýyndaǵy shyǵarma umytylmas sezimge bóledi, onyń mýzykalyq aspabynan keremet áýen qalyqtap, naǵyz ınterpretasııanyń kórinisi este qaldy. Aleksandra Stychkına Shopen shyǵarmasyna ınterpretasııa jasaýy arqyly kásibı deńgeıiniń joǵarylap kele jatqanyn kórsetti.
Kishi topqa kelsek, tyńdalymdy Sıı Chen óz baǵdarlamasyn keremet oınaýmen aıaqtady. Minsiz Chernı, keremet Mosart shyǵarmalary shalqytyp, shabyt shalǵynyn tasytty. Aıtqandaı, Sıı Chen – kishi toptaǵylardyń ishindegi sonata oınaǵan jalǵyz ǵana bala. Qalaı degenmen de, óner alańynda úlken-kishi bolyp eshkim bólinip jatpaıdy. Bárine qoıylatyn talap birdeı. Ázirge kóp kókeıinde – bir ǵana suraq. Kim jeńimpaz atanady? Bas júldege kim laıyq? Baǵy asyp turǵan baqytty jandy alda tolaǵaı tabys kútip tur – jas pıanınoshylar baıqaýynyń jeńimpazdary qomaqty aqshalaı syıaqyny ıelenbek, jarystyń júlde qory 60 000 AQSh dollaryn quraıdy.
Qarashash TOQSANBAI,
«Egemen Qazaqstan».