Prezıdenttiń halyqqa Joldaýy qoǵamnyń barlyq salasyn jańǵyrtý baǵyttarynyń jańa joldary men múmkindikterin anyqtap berdi. Joldaýda qoıylǵan naqty mindetterdiń ındıkatorlary elimizdiń 19 mıllıonnan astam halqynyń áleýmettik-ekonomıkalyq jaǵdaıyn jaqsartýdy kózdeıdi.
Eń mańyzdysy «azamat – bıznes – memleket» arasyndaǵy ózara qatynasty nyǵaıtý arqyly ulttyq ekonomıkamyzdyń turaqty damýy men básekege qabilettiligin arttyrý mindeti qoıylyp otyr. Prezıdent muny júzege asyrýdyń kelesi tetikterin usynady: «azamat – bıznes – memlekettiń» birdeı damýyna múmkindik berý, ádildik, kórsetiletin qyzmet deńgeıiniń joǵary bolýy, áleýmettik jaǵynan álsiz toptaǵy azamattarǵa qoldaý kórsetý, halyqty naryq turaqsyzdyǵynan qorǵaý jáne shaǵyn jáne orta bıznesti meılinshe damytý. Joldaýda Prezıdent reformalaýdyń naqty 5 baǵytyn anyqtap berdi. Olar: jańa ekonomıkalyq saıasat, naqty sektordy damytý, el bolashaǵyna arnalǵan strategııalyq ınvestısııa, memlekettik basqarý isin qaıta jańǵyrtý, zań jáne tártip. Usynylǵan jańa ekonomıkalyq saıasattyń negizgi basym baǵyttary: jeke kásipkerlik bastamalardy yntalandyrý; básekelestikti damytý; ulttyq tabysty ádil bólý. Aıtylǵan usynystar memleketimizdiń álemdik júıege ıntegrasııalanýy jáne básekege qabiletti ulttyq ekonomıkany damytýǵa qajetti tetikter.
Joldaýda Prezıdent Úkimetke joǵary oqý oryndaryn qoldaý saıasatyn jalǵastyrýdy júktedi. Bul óz kezeginde Ǵylym jáne joǵary bilim mınıstrliginiń aldyna oqý baǵdarlamalaryn jańa shyndyqqa beıimdeý mindetin qoıady. Sonymen qatar tıisti vedomstvo joǵary bilimniń sapasyn qamtamasyz etýi qajet. Mańyzdy qujatta básekege qabiletti mamandar daıarlaýǵa erekshe kóńil bólý qajettiligi jáne ulttyq ekonomıkany damytýdaǵy mańyzy aıtylǵan. Álemdik ekonomıka jahandanýdyń qazirgi jaǵdaıynda basqarýdyń zamanaýı ádis-tásilderin meńgergen mamandarǵa degen qajettilik kúnnen-kúnge artyp keledi.
Sol sebepti de «Ádiletti memleket. Birtutas ult. Berekeli qoǵam» atty Joldaý joǵary oqý oryndarynyń professor-oqytýshylaryna jańa serpin berdi dep senimmen aıta alamyz. О́ıtkeni memlekettik basqarýdyń jańa úlgisinde jáne ekonomıkany sıfrlandyrý zamanynda bizge kásibı bilikti, ozyq oıly jáne básekege qabiletti mamandar asa qajet. Qazirgi tańda Ál-Farabı atyndaǵy Qazaq ulttyq ýnıversıteti álemdegi úzdik 200 ýnıversıtettiń ishinde 150-oryndy ıelenip otyr. Ýnıversıtet – joǵary baǵaǵa qol jetkizgen, QS Stars Rating System halyqaralyq reıtınginde «Bes juldyz» artyqshylyǵyna ıe bolǵan Ortalyq Azııa óńirindegi alǵashqy jáne jalǵyz oqý orny.
Búginde ýnıversıtettiń «Menedjment» kafedrasynda Bolon úderisine sáıkes álemdik suranys talaptaryna saı keletin 3 deńgeıde bilim berý baǵdarlamalary júzege asyrylyp keledi. Stýdentter, magıstranttar, doktoranttar AQSh, Eýropa ýnıversıtetterinde bilim almasý boıynsha akademııalyq taǵylymdamadan ótýde. Kafedra daıarlaıtyn «Menedjment» jáne «Memlekettik jáne jergilikti basqarý» mamandyqtarynyń bilim alýshylary ǵylymı-zertteý jumystaryna belsendi qatysyp, zertteý nátıjelerin kommersııalandyrý baǵytynda qarqyndy jáne naqty jumystardy júzege asyryp júr. Sonymen qatar professor-oqytýshylardyń halyqaralyq qaýymdastyqqa enýine de úlken kóńil bólinip otyr. Aldyńǵy qatarly ǵylymı ortalyqtarmen ózara tájirıbe almasýy, yntymaqtastyq úrdisteri nyǵaıa túsip, halyqaralyq bilim berý keńistigi men ǵylymı-zertteý jobalarynda otandyq ǵalymdarymyzdyń tanymaldyǵy artýda. Osy oraıda jetekshi ǵylymı ortalyqtardy anyqtaý jáne taǵylymdamadan ótetin ǵalymdardy tańdaý ólshemderin belgileý qajettiligi týyndaıtyny belgili.
Joldaýda qoıylǵan naqty mindetterdiń ındıkatorlary Ál-Farabı atyndaǵy Qazaq ulttyq ýnıversıtetinde básekege qabiletti mamandar daıarlaýdyń jańa bilim berý baǵdarlamalaryn júzege asyrýda jańa serpin beredi. Bul maqsatta kafedranyń professor-oqytýshy ǵalymdary Joldaýda aıtylǵan basym baǵyttardy basshylyqqa ala otyryp, olardyń tabysty júzege asýyna óz úlesin qosary sózsiz.
Ońalbek ABRALIEV,
Ál-Farabı atyndaǵy QazUÝ professory