12 qyrkúıekte Qazaqstan aýmaǵynda Túrkistan eparhııasynyń 150 jyldyǵyna oraı shyǵarylǵan «Estelik jáne mereıtoılyq datalar» serııasynan 4 (tórt) poshta markasy aınalymǵa engizildi, dep habarlaıdy Egemen.kz.
Poshta markalarynda Ýspensk kafedraldy sobory, Hrıstostyń týý qurmetine arnalǵan sobor, Áýlıe Aleksandr Nevskııdiń qurmetine arnalǵan hram, Voznesensk kafedraldy sobory beınelengen.
Poshta markalaryna arnaıy belgi soǵý rásimi Qazaqstan Pravoslavıe shirkeýiniń mádenı-rýhanı ortalyǵynda, onyń basshysy – Astana jáne Qazaqstan mıtropolıti Aleksandr, «Qazposhta» AQ Basqarma tóraǵasy Serik Saýdabaev, Almaty qalasynyń ákimi Erbolat Dosaev, BAQ jáne qoǵam ókilderiniń qatysýymen ótti.
«Bul markalar buǵan deıin shyǵarylǵan markalardyń toptamasyna keremet qosymsha bolmaq. 2003 jyly Almaty qalasynyń ortalyq meshiti men Voznesensk kafedraldy sobory ǵımaraty beınelengen «Islam dini jáne álemniń basqa dinderi» serııasy shyǵarylǵan edi. Sondaı-aq 2006 jyly Almaty qalasyndaǵy Presvıataıa Troısanyń Rım-Katolıktik prıhodyna jáne «Habad Lıýbavıch» Sınagogasyna arnalǵan markalar toptamasy shyǵaryldy. «Qazposhta» AQ-da túrli konfessııany tanytatyn 18 000 myńǵa jýyq adam eńbek etedi. Bizdiń qyzmetkerlerimiz Qazposhtanyń negizgi qundylyǵy, sol sebepti árqaısysynyń dinı senim bostandyǵy quqyǵyn qurmetteımiz. Aldaǵy ýaqytta da kompanııa din jáne konfessııaaralyq dıalog taqyrybyna arnalǵan markalardy shyǵarýǵa daıyn», dedi quttyqtaý sózinde «Qazposhta» AQ Basqarma tóraǵasy Serik Saýdabaev.
Rásimge qatysýshylar álemniń 49 elinen delegattar keledi dep josparlanǵan Álemdik jáne dástúrli dinder lıderleri sezi qarsańynda markalardy shyǵarý jáne arnaıy belgi soǵý rásimin ótkizýdiń sımvoldyq mánin atap ótti.