Almatyda BAQ ókilderi bas qosqan «Jýrnalıster BAQ táýelsizdigi men kásibiniń qaýipsizdigi jolynda» taqyrybyndaǵy jıynda elimizde jýrnalıst mártebesin kóterý, buqaralyq aqparat quraldarynyń ashyqtyǵyna qatysty pikirler aıtyldy.
Jýrnalısterdiń halyqaralyq yntymaqtastyǵy kúnine oraı ótken jıyn barysynda Qazaqstandaǵy Nıderland Koroldigi elshisiniń orynbasary Naýt van Vaýdenberg sóz bostandyǵy, adam quqyǵy, azamattyq qoǵamdy damytýǵa qatysty pikir bildirip, quttyqtaý sózin arnady.
Tórtinshi bılik ókilderin tolǵandyryp otyrǵan kókeıkesti máselelerge qatysty suraqtarǵa Aqparat jáne qoǵamdyq damý mınıstrligi BAQ salasyndaǵy memlekettik saıasat departamentiniń dırektory Jasulan О́mirálıev jaýap berip, «Medıa zańnamany jetildirý elimizdiń saıası modernızasııasynyń keshendi mańyzdy bóligi» taqyrybyna baıandama jasady. Baıandamasynda ol BAQ týraly zań jobasynda qamtylyp otyrǵan máselelerge toqtaldy.
Osy oraıda «Ádil sóz» sóz bostandyǵyn qorǵaý halyqaralyq qorynyń dırektory Tamara Kaleeva azamattyq qoǵam ókilderi tarapynan usynylǵan birqatar máseleniń eskerilmeı otyrǵanyn jetkizdi. Bul aıtylǵandardyń qatarynda BAQ-tyń básekege qabilettiligin arttyrýǵa kedergi keltiretin jaıttar bar.
G.Bendıskıı atyndaǵy qordyń dırektory Sapa Mekebaev jýrnalıstik zertteýlerdiń shynaıylyǵy ári ashyqtyǵy, árbir medıa ókiliniń óz isine adaldyǵy, tapsyryspen jazylǵan maqalanyń jýrnalıstiń atyna syn ekenin atap ótse, «Sapmar» JShS dırektory Marat Asıpov memlekettik aqparattyq tapsyrysqa qatysty máselelerge toqtaldy. Al medıa zańger Igor Loskýtov jýrnalısterdiń qaýipsizdigine kepildik beretin halyqaralyq standarttardy engizý máselesin kóterdi. Osy oraıda tártip saqshylaryn daıarlaıtyn joǵary oqý oryndarynda arnaıy kýrstar engizýdi usynǵan sarapshy bul baǵyttaǵy aqparattar BAQ ókilderine qurmetpen qaraýǵa yqpal etetindigin aıtty.
Naryqtaǵy menshik máselesi, memlekettik medıany qarjylandyrý, demonopolızasııa máselesin qozǵaǵan Internews medıa zańgeri Olga Dıdenko medıany senimdi ınstıtýt retinde qarastyra kelip, sapaly kontentti kúsheıtýde ózin-ózi retteý turǵysynan alǵanda memlekettik basqarý, qoǵam jáne bıznespen tyǵyz áriptestikte nátıjeli reformalarǵa qol jetkizýge bolatynyn atap ótti.
«Túrkitildes jýrnalıster qorynyń» prezıdenti Názııa Joıamergen baıandamasynda elimiz óńirleri boıynsha júrgizgen áleýmettik zertteýlerge toqtaldy. Sarapshynyń aıtýynsha, jaýap bergenderdiń 97 paıyzy BAQ-ta jarııalaýǵa ruqsat etilmeıtin taqyryptardyń bar ekendigin alǵa tartqan. Bul, ásirese bılik ókilderiniń áreketine, jemqorlyqqa qatysty zertteýlerge baılanysty. Al saýaldamaǵa qatysqan jýrnalısterdiń 92 paıyzy maqala jazý barysynda keıbir ákimdikter tarapynan qysym kórsetiletinin, aımaqtardaǵy jýrnalısterdiń jalaqysynyń azdyǵy bıýdjettik qoldaý men demeýshilerdiń qarjysyna táýeldi etetinin atap ótken. «Osy oraıda memlekettik tapsyrys tolyǵymen ashyq bolý qajet», degen PR-maman Ásel Qaraýlova jarııalanatyn materıalda tapsyryspen jazylǵandyǵy jaıynda málimet kórsetilýge tıis ekendigin alǵa tartty.
Dóńgelek ústelde, sonymen qatar Baılanys jáne aqparat jónindegi maman Sergeı Karpov IýNESKO-nyń baspasóz bostandyǵy, jýrnalısterdiń, onyń ishinde áıel jýrnalısterdiń qaýipsizdigine baılanysty aqparattardyń qoljetimdiligine toqtaldy. Ásirese memleket pen BAQ arasyndaǵy ashyq ári ádil baılanystardy qoldaý baǵytyndaǵy is-sharalarǵa mán berilip keledi.
Dóńgelek ústelge qatysýshylar jýrnalısterdiń qoǵamdaǵy róli, qaýipsizdigi, «bloger», «kommýnıkasııa» uǵymdaryna qatysty máselelermen qatar baspasóz ónimderin taratý, qosymsha qun salyǵy, qala, aýdan ortalyqtarynda joıylyp ketken gazet dúńgirshekterin jandandyrý máselesin qozǵady.
ALMATY