Orman órti saldarynan baspanasy men dúnıe-múlkinen aıyrylǵan Áýlıekól aýdanynyń turǵyndaryna qarjylaı kómek kórsetý týraly halyqtyń bastamasyn Qarýly kúshterdiń áskerı qyzmetshileri de qoldady.
Áskerıler Qostanaı oblysyndaǵy alapat órtten zardap shekkenderge kómek kórsetetin «Qaıyrymdylyq KZ» biryńǵaı qoǵamdyq qoryna 6 mln 200 myń teńge aýdardy.
Budan ózge «Ońtústik» jáne «Shyǵys» óńirlik qolbasshylyqtarynyń áskerı qyzmetshileri zardap shekkenderge qurylys materıaldary, azyq-túlik jáne jyly kıimder tıelgen úsh KamAZ kómek jiberdi. Gýmanıtarlyq kómektiń jalpy salmaǵy 23 tonnaǵa jetti.
Qostanaı oblysyndaǵy órtti sóndirýge ofıserler men kelisimshart boıynsha áskerı qyzmetshiler qatarynan 180-ge jýyq áskerı qyzmetshi jumyldyrylǵanyn aıta ketken jón.
Olar Áýlıekól aýdanynyń Baǵanaly, Ozernoe jáne Novonejınka eldi mekenderinde órt apatynyń taralýyna jol bermeýge eleýli kómek kórsetti. О́rtke qarsy is-sharalardy ótkizý barysynda ınjenerlik tehnıka jáne kólik-jaýyngerlik tikushaqtar jumyldyrylyp, olar aýdandy barlaýdy jáne órt oshaǵyna sý shashýdy júzege asyrdy.
Qıyn sátte armııa árqashan halyqqa kómek kórsetýge daıyn. COVID-19 pandemııasy kezinde zalalsyzdandyrý jumystaryn júrgizip, Túrkistan oblysynyń Maqtaaral aýdanyndaǵy sý tasqyny kezinde áskerı qyzmetshiler ýaqytsha bógetter turǵyzyp, apatqa ushyraǵan aýdan turǵyndaryn evakýasııalady.