25-26 qyrkúıek kúnderi Jambyl atyndaǵy Qazaq memlekettik fılarmonııasynda alǵash ret halyqaralyq «Dırıjerler sherýi» mýzyka festıvali ótedi, dep habarlaıdy Egemen.kz.
Festıval aıasynda Qazaqstan Respýblıkasynyń Memlekettik úrmeli aspaptar orkestri (QR MÚAO) óziniń 33-konserttik maýsymyn ashady. Kórkemdik jetekshisi jáne bas dırıjeri - QR eńbek sińirgen qaıratkeri Qanat Ahmetov, dırıjer - Qazaqstannyń eńbek sińirgen qaıratkeri, «Qurmet» ordeniniń ıegeri Aleksandr Belıakov.
Alys-jaqyn shetelden keletin 10 dırıjer qazaqstandyq kórermen aldynda óz ónerlerin pash etpek. Estonııadan Margýs Kasemaa, Latvııadan Spodrıs Kachans, Reseıden Vıktor Hýdoleı, (Polshadan Darıýsh Adam Ledjıon, Izraılden Samýel Hagın, Gresııadan Nıkolas Hrıschohoý, Slovenııadan Mıro Saıe, О́zbekstannan Tımýr Mırzaev, Qazaqstannan Qanat Ahmetov pen Aleksandr Belıakov qatysady. Festıval sharttaryna sáıkes, olardyń árqaısysy óz eliniń úzdik týyndylaryn usynady. Atap aıtqanda, baǵdarlamaǵa sáıkes E.Tammnyń «Eston rapsodııasy», R.Kýlldyń «Týlıak», R. Paýlstyń «Melodııa», V. Kılıardyń «Reseı dalasy», «Pan Tadeýsh» fılminen «Polonez», N.Shemerdiń «Altyn Ierýsalım», N.Skalkotastyń «Grek bıleri», E. Jıvaevtyń aranjırovkasyndaǵy «Batyr Zakırovtyń ánderi», Á.Bestibaevtyń «Toıbastar» , «Azııa daýysy» shyǵarmalary oryndalady.
Festıvaldiń mańyzdylyǵy – tájirıbe almasý, kásibı qasıet-qarymyn shyńdaý. Aldaǵy ýaqytta «Dırıjerler sherýi» festıvali dástúrli túrde ótkiziledi dep josparlanýda.
Kesh baǵdarlamasynda usynylatyn ár halyqtyń mýzykalyq ónerindegi biregeı format, shyǵarmalardyń alýan túrliligi, ózindik ereksheligi men qaıtalanbas áýeni óner súıer qaýymǵa ǵajaıyp kóńil-kúı syılaıtyny sózsiz.
Kesh Jambyl atyndaǵy Qazaq memlekettik fılarmonııasynyń Úlken zalynda saǵat 18.00-de bastalady.
1990 jyly qurylǵan Memlekettik úrmeli aspaptar orkestri qazaq kompozıtorlary shyǵarmalaryn oryndaý sheberligimen álemniń túkpir-túkpirinen kelgen tyńdarmandardyń nazaryna ilikti. Búgingi tańda orkestrde respýblıkalyq jáne halyqaralyq konkýrstardyń laýreat mýzykanttary men dıplomanttary jumys isteıdi. Orkestr repertýarynda 200-den astam konserttik baǵdarlamalary bar. Reseı, Germanııa, AQSh, Fransııa, Anglııa, Qytaı elderiniń ataqty dırıjerleri men mýzykanttary árdaıym ujymnyń joǵary kásibıligin, minsiz ıntonasııasy men aspaptardy asqan sheberlikpen meńgerýin, orkestr músheleriniń tamasha úılesimdiligin, baı dybystalý tembrin, baı repertýaryn aıyryqsha atap ótedi. Bas dırıjer – Qazaqstannyń eńbek sińirgen qaıratkeri, professor Qanat Ahmetov. Dırıjer – Qazaqstannyń eńbek sińirgen qaıratkeri, «Qurmet» ordeniniń ıegeri Aleksandr Belıakov. Qazaqstan kompozıtorlarynyń shyǵarmalary toptastyrylǵan respýblıka tarıhyndaǵy tuńǵysh kompakt-dısk Orkestrdiń oryndaýynda jazyldy. Ujymnyń sońǵy jetistikteriniń biri – «Marshı nashıh pobed» (Reseı) Halyqaralyq onlaın-baıqaýyndaǵy bas júldesi.