Bıyl da joǵary bilimniń baıyrǵy qarashańyraǵy Ál-Farabı atyndaǵy Qazaq ulttyq ýnıversıteti «Stýdentter qataryna qabyldaý» keshin ótkizip, QazUÝ qalashyǵyn keremet kúıge bóledi. Degenmen ýnıversıtet bıylǵy saltanatyna sony jetistiktermen kelip otyr, dep jazady Egemen.kz.
Atalǵan ýnıversıtet QS WUR álemdik reıtınginde 150-orynǵa kóterildi. Oǵan qosa jaqynda Úkimet qaýlysymen QazUÝ-ǵa zertteý ýnıversıteti mártebesi berildi.
Osynaý aıtýly oqıǵa aıasynda Almaty qalasynyń ákimi Erbolat Dosaev, belgili ǵalymdar, jazýshylar, qazaqstandyq estrada juldyzdary, blogerler, ýnıversıtet oqytýshylary men stýdentteri ortaqtasyp, eńseli Ál-Farabı eskertkishi aldynda toǵysty.
Dástúrli merekede birinshi kýrs stýdentteri sherýletti. Sodan keıin saltanatty sharaǵa jınalǵan 5 myń adam Ánurandy birge oryndady.
Ál-Farabı atyndaǵy QazUÝ-dyń Basqarma Tóraǵasy – Rektory Janseıit Túımebaev birinshi kýrs stýdentterin ómirdegi aıtýly kúnmen quttyqtaı otyryp, ýnıversıtettiń qazirgi jetistikteri jaıly baıandady.
Aıtqandaı, qazirgi ýaqytta álemdik reıtıngtegi kóshbasshy oqý oryndarynyń qataryna qosylǵan ýnıversıtetke Prezıdent Qasym-Jomart Toqaev bıyl alǵash ret kelip, bilim alyp otyrǵan jastarmen kezdesip, ýnıversıtetti damytý jóninde birqatar tapsyrma bergeni aıan. Memleket basshysynyń qoldaýymen bıyl Túrkııanyń Ystanbul qalasy men Qyrǵyz Respýblıkasynyń astanasy Bishkekte QazUÝ fılıaldary ashyldy. Sonymen qatar QazUÝ-da Ǵylym jáne joǵary bilim mınıstri Saıasat Nurbektiń qatysýymen Reseıdiń MIFI Ulttyq ıadrolyq zertteý ýnıversıtetiniń fılıaly ashyldy.
Ýnıversıtette 25 myńǵa jýyq stýdent oqıdy, olardyń 2,5 myńǵa jýyǵy – álemniń 50 elinen kelgen sheteldik stýdentter. Jańa oqý jylynda QazUÝ-ǵa 7 690 stýdent qabyldandy. Memlekettik grantty 5 156 talapker utyp alsa, aqyly bólimge 2 534 stýdent oqýǵa tústi. Olardyń ishinde 672 Altyn belgi ıegeri, 619 úzdik attestat ıegeri, 12 Ǵylymı joba jeńimpazy, 69 halyqaralyq jáne respýblıkalyq olımpıada júldegeri bar.
JOO basshysy óz sózinde: «Ýnıversıtettegi fakýltetter, kafedralar, ǵylymı-zertteý ınstıtýttary, ınnovasııalyq zerthanalar men ǵylymı ortalyqtardyń barlyǵy Sizderdiń tolyqqandy bilim alýlaryńyzǵa qyzmet etedi. О́tken jyldan beri jataqhanalar men oqý korpýstary kúrdeli jóndeýden ótti. Bul jumystar bıyl da jalǵasyp jatyr. Aldaǵy ýaqytta jańa jataqhana salý josparda bar. Osy ıgilikterdi durys paıdalanyńyzdar. Ǵylymdy ıgerip, bilikti maman bolyńyzdar», dep stýdentterge úndeý tastady.
Bıylǵy saltanatty rásim formaty dástúrli kilt berýden ózgeshe, jańa tehnologııalardy paıdalana otyryp júzege asty. Birinshi kýrs stýdentteri sahnadan derbes QR-kodyn skanerlep, erekshe sátke barshasy atsalysty.
Sonymen saltanatty oqıǵa konserttik baǵdarlamaǵa ulasyp, sahnada «Ulytaý» etno-rok-toby, tanymal ánshi Gúlnur Orazymbetova, jastar ánderin jıi tyńdaıtyn MALIKA YES, «Melomen» toby jáne ózge de estrada juldyzdary ánnen shashý shashty.
Merekede QazUÝ-dyń talantty, kreatıvti jastary da óz ónerlerin pash etti. Hımııa jáne hımııalyq tehnologııalar jáne bıologııa jáne bıotehnologııalar fakýltetteriniń stýdentteri ýnıversıtet ǵalymdarynyń ǵylymı jańalyqtarynyń tusaýkeserin ótkizdi. Kórermender «QazUÝ stýdentteriniń sporttyq jetistikteri» kompozısııasyn tamashalap «Chempıon» ánine qulaq túrdi. JOO sportshylaryna, halyqaralyq jáne ulttyq jarystardyń jeńimpazdaryna kýboktar tabys etildi. Qyzdar kvarteti «Qazaq, qyrǵyz bir týǵan» ánin áýelete shyrqady. Sondaı-aq «Farabı qyzdary», RAIM toby da sahnada án shyrqap, kórermenderdiń qoshemetine bólendi.
Jastar uıymdarynyń komıteti ártúrli fleshmob daıyndaǵan eken, bul da merekeniń sánin keltirdi. Stýdentter merekesi fantastıkalyq lazerlik shoý men bı keshine ulasty.