Qazirgi ýaqytta Astana qalasynda 11 qoıma bar, onda halyq úshin 14 kómir satý núktesi uıymdastyrylǵan, dep habarlaıdy Egemen.kz qala ákimdiginiń resmı saıtyna silteme jasap.
Kómir satý núkteleri tıisti ınfraqurylymmen jáne tıeý-túsirý tehnıkasymen tolyq jabdyqtalǵan. Bul jerlerde 8 kompanııa-realızatorlar óz qyzmetin júzege asyrady.
Jylytý maýsymyna daıyndyq jáne ony ótkizý kezeńinde kómir satýshylardan 463 myń tonnadan astam kómir mólsherinde ótinimder resimdeldi. Otyn qory turaqty negizde tolyqtyrylyp otyrady.
«Baǵanyń ósýine jol bermeý maqsatynda tamyz aıynda barlyq kompanııalarmen kómir qunyn bekitý týraly tıisti memorandýmdar jasaldy. 109 nómiri boıynsha «Qaýyrt jeli» jumys isteıdi, onda tuıyqtyqtaǵy kómirdiń qory, baǵasy jáne bar-joǵy týraly bilýge bolady», delingen habarlamada.
Bıyl kómirdiń ortasha baǵasy ótken jyldyń deńgeıinde saqtaldy:
Shubarkól - tonnasyna 13 800 tg; Qarajyra - tonnasyna 14 500 tg; Maıkóbe - tonnasyna 12 700 tg.
Ákimdik ókilderi habarlaǵandaı, elordada qalany gazdandyrý jumystary jalǵasýda. Máselen, Almaty jáne Saryarqa aýdandaryndaǵy úıler gazǵa qosý múmkindigimen tolyq qamtamasyz etildi. Búginde 680 km astam gazben jabdyqtaý jelileriniń qurylysy aıaqtaldy, kvartalishilik jeliler tartyldy. Jalpy, gazǵa 5,7 myńnan astam úı qosylǵan.
Sondaı-aq Baıqońyr men Esil aýdandarynda gaz qubyryn tartý jumystary júrgizilýde.