Bas prokýrordyń orynbasary Áset Shyndalıev Májilis kýlýarynda Ulttyq qaýipsizdik komıtetiniń burynǵy tóraǵasy Kárim Másimovke qatysty is boıynsha túsinikteme berdi, dep habarlaıdy Egemen.kz.
Áset Shyndalıev bul isti UQK tekserip jatqanyn eske saldy.
«Bul iske qupııalylyq belgisi berilgen, ıaǵnı oǵan qatysty materıaldar BAQ-qa taratylmaıdy jáne jarııalanbaıdy», dedi ol.
Bas prokýrordyń orynbasary bul is boıynsha kúdiktilerdiń barlyǵy qamaýda ekenin atap ótti.
«Eshkim eshqaıda ketip, jasyrynǵan joq. Is aıaqtaldy, is materıaldarymen tanysý bastaldy. Biz ispen tanysý úshin is júrgizý shekteýlerin qoıǵan joqpyz», dep qosty Áset Shynalıev.
Eske sala ketsek, 6 qańtarda Qazaqstan Prezıdenti Qasym-Jomart Toqaev kadrlyq aýys-túıister júrgizip, Kárim Másimovti Ulttyq qaýipsizdik komıtetiniń tóraǵasy qyzmetinen bosatty. Ol bul qyzmetti 2016 jyldan beri atqaryp kelgen.
Sol kúni UQK memlekettik opasyzdyq faktisi boıynsha sotqa deıingi tergeý bastalǵanyn habarlady. Atalǵan qylmysty jasady degen kúdikpen UQK-niń burynǵy tóraǵasy Kárim Másimov pen basqa da adamdar ustalyp, ÝUI-ǵa qamaldy.
13 qańtarda UQK Kárim Másimovten basqa, UQK tóraǵasynyń eks-orynbasary - «A» arnaıy maqsattaǵy qyzmetiniń bastyǵy Ánýar Sadyqulov pen UQK tóraǵasynyń orynbasary Dáýlet Erǵojınniń ustalǵanyn naqtylady.
14 naýryzda QR Bas prokýrory Berik Asylov Kárim Másimov 17 jylǵa bas bostandyǵynan aıyrylýy múmkin ekenin habarlady.
22 sáýirde Sybaılas jemqorlyqqa qarsy qyzmet QR QK-niń 366-baby 4-bóligi boıynsha Pavlodar oblysy polısııa departamentiniń eks-bastyǵy Nurlan Másimovke qatysty sotqa deıingi tergeýdi bastaǵany belgili boldy, oǵan asa iri mólsherde para aldy degen aıyp taǵyldy. Osylaısha, Nurlan Másimovke izdeý jarııalandy. Antıkor onyń ornalasqan jeri týraly aqparat úshin 12 mln teńge kóleminde syıaqy beriletinin habarlady.
25 tamyzda Ulttyq qaýipsizdik komıteti Kárim Másimov, Ánýar Sadyqulov, Dáýlet Erǵojın, Marat Osıpov jáne laýazymdy tulǵalar D.M.Akıpov pen N.K.Bekmuratqa qatysty qylmystyq isti tergeýdi aıaqtaǵany belgili boldy.